काठमाडौं। जगदम्बा स्टिल्सका सञ्चालक साहिल अग्रवाल २ अर्ब ५० करोड बक्यौता नतिर्नको लागि शक्ति केन्द्रमा धाउन थालेका छन् । नेपाल विद्युत प्राधिकरणले बाँकी बक्यौता तिर्नको लागि ताकेदा गरेपछि उनी शक्ति केन्द्र धाउन थालेका छन् । प्राधिकरण स्रोतकाअनुसार जगदम्बा स्टिल्सले २ अर्ब ५० करोड रुपैयाँ बक्यौता तिर्न बाँकी छ ।
साहिल भने उक्त बक्यौता नतिर्नको लागि सक्रिय भएका छन् । यसको लागि उनले यसअघिको सरकारको पालादेखि नै लविङ गरेका थिए । खासगरी तत्कालिन उद्योग, वाणिज्य तथा आपूर्ति राज्यमन्त्री मोतिलाल दुगडमार्फत अग्रवालले लविङ गरेका थिए ।
अग्रवाल परिवारले शंकर ग्रुपअन्तर्गत विभिन्न व्यापार तथा व्यवसाय गर्दै आएको छ । तर, शंकर ग्रुप पछिल्लो समय एकपछि अर्को गरेर विवादमा मुछिएको छ । यसअघि कोरोना महामारीकै बेलामा थर्मल गनको कालोबजारी गरेको कारण सुलभ अग्रवाल पक्राउ परेका थिए । पैसा कमाउनको लागि कालोबजारी पनि गर्न नछोड्नेहरुले कम्पनीले प्राधिकरणलाई तिर्नुपर्ने विद्युत बक्यौता नतिर्नको लागि शक्ति केन्द्र धाउनु ठूलो कुरा नभएको जानकारहरुको भनाई छ ।
महालेखा परीक्षकको कार्यालयले सार्वजनिक गरेको ५८औं वार्षिक प्रतिवेदनमा बक्यौतामध्ये ट्रङ्क तथा डेडिकेटेड लाइनतर्फका ४९ ग्राहकबाट मात्रै १५ अर्ब ५३ करोड ५८ लाख बक्यौता उठ्न बाँकी रहेको छ । यसमा जगदम्बा स्टिल्सको मात्रै २ अर्ब ५० करोड रुपैयाँ बाँकी छ ।
अहिले उर्जा तथा जलस्रोतमन्त्री पम्फा भुषालले विद्युत प्राधिकरणलाई बाँकी बक्यौता रकम तत्काल उठाउनको लागि निर्देशन दिएकी छिन् । प्राधिकरणमा अहिले कार्यकारी प्रमुखमा कुलमान घिसिङ आएका छन्। उनले पनि बाँकी बक्यौता रकम उठाउन मातहतका कर्मचारीलाई कडा निर्देशन दिएका छन् ।
