काठमाडौँ – अफगानिस्तानको राजधानी काबुल विमानस्थलबाहिर भएको विस्फोटमा ६० जना भन्दा बढीको मृत्यु भएपछि अमेरिकी राष्ट्रपति जो बाइडेनले आतंकवादीहरुलाई नछाड्ने चेतावनी दिएका छन्।
विस्फोटमा अमेरिकी सुरक्षाकर्मी सहित ६० भन्दा बढीको मृत्यु भएको खबरले दुःखी भएको बताउँदै उनले घटनमा संलग्नविरुद्ध कडा कारबाहीको चेतावनी दिएका हुन् । उनले अफगाननिस्तानबाट अमेरिकी हवाई उद्धार कार्य जारी रहने जनाएका छन् ।
उनले यस्ता आतंकवादी हमलाबाट अमेरिका विचलित नहुने र उद्धार जारी रहने स्पष्ट पारेका छन् । स्थानीय समअनुसार साँझ ६ बजे विमानस्थलको गेट र विमानस्थल नजिकै रहेको बारोन होटल आसपास विस्फोट भएको जनाइएको छ ।
विमानस्थलको गेटमा विस्फोट हुँदा त्यहाँ धेरै अफगानी शरणार्थीहरु रहेको थिए ।
उक्त होटलमा बेलायती अधिकारीहरुले बेलायत जान चाहने अफगानीहरुको कागजी प्रक्रियाका लागि प्रयोग गरिरहेका बेला विस्फोट भएको बीबीसीले जनाएको छ ।
बेलायतको रक्षा मन्त्रालयल यस हमलामा बेलायती सुरक्षाकर्मी र आफ्ना नागरिक सुरक्षित रहेको जनाएको छ ।
दुईवटा विस्फोटमा उनीहरुको ज्यान जानुका साथै १४० भन्दा बढी घाइते भएको अफगानिस्तान स्वास्थ्य अधिकारीलाई उद्धृत गर्दै बीबीसीले जनाएको छ ।
पेन्टागन प्रवक्ता जोन कीर्बीलेले पनि काबुल विमानस्थलमा भएको विस्फोटमा अमेरिकी नागरिकको मृत्यु भएको पुष्टि गरेका छन् ।
यसअघि नै अमेरिका र बेलायतले काबुलस्थित अन्तर्राष्ट्रिय विमानस्थलमा आइएसआइएस-के ले आत्मघाती हमला गर्नसक्ने भन्दै पहिले नै चेतावनी दिएको भए पनि उद्धारका विमानस्थल आसपासको क्षेत्रमा ठूलो भिड जम्मा भएको थियो।
आक्रमणको जिम्मा जिहादी समूहले लिएको बीबीसीले जनाएको छ । अगस्ट १५ तारिखमा तालिबानले आफ्नो नियन्त्रणमा लिएको काबुलबाट हालसम्म अमेरिकी हवाई उद्धारमार्फत १ लाख मानिसहरुलाई उद्धार गरी स्वदेश फर्काइएको छ ।
फ्रान्सेली राजदूत डेविड मारटिननले विस्फोटका अन्य घटनाहरु हुनसक्ने भन्दै आफ्ना नागरिकलाई सुरक्षित रहन आग्रह गरेका छन् । यसैगरी फ्रान्सेली राष्ट्रपति इमेनुएल मैक्रोंले अफगानिस्तानको स्थिति तब खतरापूर्ण बनेको भन्दै सबैलाई सुरक्षित रहन आग्रह गरेका छन् ।
