धरान । आफ्नो टोलमा विभिन्न क्षेत्रका लागुऔषध प्रयोगकर्ताहरुको चहलपहल बढेर झैं–झगडा हुन थालेपछि धरान १६ नौलो पथमा आमा समूहले सक्रियता बढाएको छ ।
नौलो पथमा सोही टोलका युवा तथा अन्य क्षेत्रबाट युवाहरुको चलहपहल बढेर लागुऔषधको कारोबार हुने गरेको र उनीहरुबीच लेनदेनमा समस्या भई कुटपिट, काटमार तथा दिनहुँ झगडा हुन थालेपछि गत साउन २९ गते निरा धमलाको अध्यक्षतामा आमा समूहको गठन भई दैनिक गस्ती शुरु भएको छ ।
राती ११ बजेसम्म टोलमा गस्ती गर्दा लागुऔषध प्रयोगकर्ता तथा विक्रेताहरुले मोटर साइकल, स्कुटी आदि प्रयोग गर्ने र उल्टै आमा समूहलाई ‘गाडीले किच्याई दिन्छु’, ‘म यहिँको लोकल हुँ’ जस्ता शब्दले धम्क्याउने गरेको उपाध्यक्ष दीपा पोखरेलले बताईन् । उनले भनिन्, ‘टोलमा शान्ति सुरक्षा माग गरेको २ वर्षभन्दा बढि भइसक्यो तर हामीले सुरक्षा नपाए पछि आफै सक्रिय भएका हौं ।’
आमा समूहले कुलतमा फसेका युवाहरुलाई रातको समयमा हिडडुल नगर्न सचेत गराएको छ । अटेर गर्नेलाई सम्झाएर चेतावनी समेत दिएको सचिव जुनु लावरले बताइन् । तर, युवाहरु लागुऔषधको नशामा हुने र उल्टै गस्तीलाई नै आक्रमण गर्न खोजेकोले तत्काल प्रहरीको सहयोग चाहिने बताइन् ।
टोलवासीले प्रहरी चौकीको माग गरेता पनि जनशक्तिको अभाव र माथिल्लो तहको स्वीकृति आवश्यक पर्ने भएकोले प्रहरी चौकी स्थापना गर्न नसकिने इलाका प्रहरी कार्यालयले बताएको छ । सुरक्षामा चुनौती भए प्रहरीलाई खबर गर्दा तत्काल उपस्थित हुने र अपराधिक क्रियाकलापमा सम्लग्नलाई कार्बाही गर्ने प्रहरीले बताएको छ ।
टोलवासीले वडाध्यक्ष दिलकुमार गिरी सहित सरोकारवाला व्यक्तिहरुलाई टोलको सुरक्षा सम्बन्धमा जानकारी गराएको सहसचिव कमला मगरले बताइन् । वडा कार्यालय, प्रहरी र टोल विकास समितिले समेत आमा समूहलाई सहयोग गरेको बताइन् । टोलमा शान्ति सुरक्षा कायम गर्नु सबैको दायित्व भए पनि रातको समयमा आमाहरु मात्रै गस्तीमा हिड्दा युवाहरुबाट धम्की आएकोले प्रहरीको समेत प्रत्यक्ष गस्ती हुनुपर्ने उनले जोड दिएकी छन् ।
टोलमा गरिब तथा सुकुम्बासी वस्तीको बाहुल्यता भएकोले आर्थिक रुपमा समेत टोलवासी कमजोर भएकोले स्थानीय सरकार तथा विभिन्न संघ संस्थाको सहयोग आवश्यकता रहेको कोषाध्यक्ष संगीता राईले बताइन् । उनले समाज सुधार गर्न आमा समूह मात्रै पर्याप्त नहुने भएकोले टोलमा विभिन्न शिक्षा तथा सचेतनामूलक कार्यक्रमका लागि विभिन्न संघ संस्थाहरुसँग सहकार्यका लागि समेत आव्हान गरेकी छन् ।
आमा समूहका पदाधिकारी तथा सदस्यहरु सपना राई, चन्द्र राई, आशा राई, कमला बन, रमा राई, उपेन्द्र कुमारी नेम्वाङ लगायतको समूहले गस्तीमा सुरक्षा चुनौती रहेको भन्दै वडा कार्यालय र प्रहरी कार्यालयबाट प्रत्यक्ष सहभागिता हुनुपर्नेमा जोड दिएका छन् । प्रहरीलाई फोन गरेर बोलाउँदा समेत समयमा नै निगरानी नहुँदा अपराधिक क्रियाकलाप गर्नेहरुको मनोबल बढेको बताएका छन् । टोलमा दिनहुँ काटमार हुने, होहल्ला हुने, छाडा तथा अपाच्य शब्दको प्रयोग हुँदा बालिबालिका तथा समाजमा नकरात्मक असर पारेको बताए । आमाहरुले हातमा लठी लिएर गस्ती गर पनि सवारी साधनमा लागुऔषध प्रयोग कर्ता र खरिद एवम् विक्रेताहरुको बाक्लो आवत जावत हुने भएकोले गस्तीमा चुनौती भएको बताएका छन् ।
रातको समयमा बिगबिगि हिडेको फेला पारेपछि किन यसरी हिडेको भन्दा विभिन्न बहाना बनाउने गरेको र उल्टै महिला समुहमाथि नै सुरक्षा खतरा रहेको बताइएको छ । अस्थायी चौकीको माग गरेको २ वर्ष वितिसक्दा समेत इलाका प्रहरी कार्यालयले वेवास्ता गरेको छ । उक्त टोलमा भएको झगडा र होहल्लाका कारण नजिकका टोलहरु लोकतन्त्र वस्ती, पुलचौक प्रगतिमार्ग, भूपीपथ लगायतमा समेत समस्या उत्पन्न भएको छ । आमा समूहले प्रहरी सुरक्षा गस्ती बढाई दिनुपर्ने, समाजलाई सचेतना तथा प्रशिक्षण लगायतका कार्यक्रम सञ्चालन गरिदिन स्थानीय सरकारसँग माग गरेका छन् ।
नेपाल बसोबास बस्ती संरक्षण समाज धरान नगर समितिका सहसचिव अमर सुवेदीले लागुऔषध प्रयोग कर्ता र बिक्रेताहरुको बढि ध्यान वस्तीमा गएको बताए । गरिब तथा सुकुम्बासी वस्तीमा गएर धनाड्यहरुले हेप्ने गरेको भन्दै प्रत्येक वस्तीमा नौलो पथका आमाहरु जस्तै सचेत भएर लाग्नु पर्ने बताए । उनले भने, ‘वस्तीका विभिन्न टोलमा अपराधिक घटनामा बृद्धि भएको छ । त्यस्ता गतिविधि रोक्न बस्तीवासी स्वयम् जागरुक भई सबैको सचेत प्रयत्न गर्नुपर्छ । आमा समूहलाई पत्याएनन् भने पुरुषहरु पनि गस्तीमा हिड्नुपर्छ ।’
