सप्तरी/बागलुङ । लगातारको वर्षाका कारण सप्तरी र बागलुङमा जनजीवन प्रभावित भएको छ । सप्तरीमा बाढीका कारण ५०० घर डुबानमा परेका छन् भने बागलुङमा दुई राष्ट्रिय राजमार्गसहित दर्जनौँ सडक अवरुद्ध हुँदा सदरमुकामसँग विभिन्न ग्रामीण बस्तीको यातायात सम्पर्क विच्छेद भएको छ ।
सप्तरीको हनुमाननगर कङ्कालिनी नगरपालिका र तिलाठी कोइलाडी गाउँपालिकामा बाढी पस्दा करिब दुई हजारभन्दा बढी मानिस प्रभावित भएका छन् । हनुमाननगर कङ्कालिनी नगरपालिका–५, ७, १२ र १३ का बस्तीमा बाढी पस्दा ४८३ घर डुबानमा परेका छन् । त्यस्तै, तिलाठी कोइलाडी गाउँपालिका–४ र ५ मा १७ घर डुबानमा परेका छन् । शुक्रबार राति सप्तकोशी नदीमा पानीको सतह बढेपछि बस्तीमा बाढी पसेको हनुमाननगर कङ्कालिनी नगरपालिकाका प्रमुख वीरेन्द्र माझीले जानकारी दिए ।
नगरप्रमुख माझीका अनुसार बाढीबाट प्रभावित परिवारका लागि तत्काल बिहान र बेलुका दुई छाक खानाको व्यवस्था गरिएको छ । पानीको सतह केही घटेपछि प्रभावित परिवारको पहिचान गरी थप राहत सामग्री उपलब्ध गराउने तयारी गरिएको उनले बताए । बाढीका कारण प्रभावित स्थानीयलाई तत्काल राहत तथा खाद्यान्नको व्यवस्था गर्न स्थानीय तह जुटेको छ ।
यता, बागलुङमा दुई दिनदेखि लगातार परेको वर्षाका कारण कालीगण्डकी करिडोर र मध्यपहाडी लोकमार्गसहित विभिन्न शाखा तथा ग्रामीण सडकमा बाढीपहिरोले क्षति पुर्याएको छ । गलकोटदेखि ताराखोला गाउँपालिका जोड्ने गलकोट–ताराखोला सडकको गाईघाट झरना क्षेत्रमा ताराखोला नदीले पक्की सडक कटान गरेपछि शुक्रबारदेखि यातायात अवरुद्ध भएको छ । बागलुङ बजारदेखि तित्याङ, रायडाँडा हुँदै भकुण्डे जोड्ने सडकको गौडाकोटमा पहिरो खसेपछि आवागमन बन्द भएको छ ।
त्यस्तै, बागलुङ नगरपालिका–१ रामरेखास्थित गणेशथान घुम्तीदेखि निरयघाट जाने सडक र बागलुङ बजारदेखि सिगाना हुँदै सायकोट जाने सडक पहिरोका कारण अवरुद्ध भएका छन् । बागलुङ बजारदेखि दब्ल्याङ हुँदै बलेवा–कुश्मिसेरा जोड्ने मुख्य सडक बन्द हुँदा दक्षिण बागलुङको यातायात सम्पर्क प्रभावित भएको छ । मुलपानी–तितौरे सडकको तल्लो पात्लेमा पहिरो खसेपछि सडक पूर्ण रूपमा अवरुद्ध भएको छ । बरेङ जाने सडक, निसीखोलाका ग्रामीण सडक तथा ढोरपाटनका विभिन्न ग्रामीण सडकमा समेत पहिरो खस्दा यातायात सञ्चालनमा समस्या भएको छ ।
जिल्ला प्रहरी कार्यालय बागलुङका प्रहरी उपरीक्षक फणिन्द्र प्रसाईँले वर्षाका कारण राष्ट्रिय राजमार्गदेखि ग्रामीण सडकसम्म अवरुद्ध भएको जानकारी दिए । उनका अनुसार अवरुद्ध सडक खुलाउन सडक आयोजनाका प्रमुख, सडक डिभिजन कार्यालय, निर्माण व्यवसायी तथा स्थानीय तहसँग समन्वय भइरहेको छ । लगातारको वर्षाका कारण सडक अवरुद्ध हुँदा ग्रामीण क्षेत्रका बासिन्दालाई सदरमुकाम आवतजावत गर्न कठिनाइ भएको छ ।
