काठमाडौं । नेपालमा बाढीबाट भएको क्षतिको पुनःस्थापना तथा पुनर्निर्माणका लागि अमेरिकाले थप ३१ मिलियन अमेरिकी डलर सहयोग घोषणा गरेको छ। न्यूयोर्कमा नेपालका परराष्ट्रमन्त्री शिशिर खनालसँग भएको भेटवार्तामा अमेरिकी विदेश मन्त्रालयकी राजनीतिक मामिलासम्बन्धी उपसचिव एलिसन हुकरले उक्त सहयोग घोषणा गरेकी हुन्।
भेटका क्रममा हुकरले बाढी तथा विपद्बाट प्रभावित नेपाली नागरिकप्रति समवेदना व्यक्त गर्दै सम्पर्कविहीन रहेका करिब ७० जना अमेरिकी नागरिकका परिवारप्रति समेत सहानुभूति प्रकट गरेकी थिइन्। अमेरिकी पक्षले नेपालमा बाढीपछिको उद्धार, राहत, पुनःस्थापना र पुनर्निर्माणका लागि नेपाल सरकारसँग निरन्तर समन्वय गर्ने जनाएको छ।
घोषित सहयोगमध्ये १० मिलियन डलर यातायात पूर्वाधार पुनःस्थापना तथा क्षेत्रीय सम्पर्क विस्तारमा खर्च गरिनेछ। यसअन्तर्गत अमेरिकी कम्पनीबाट स्थायी तथा आवश्यकताअनुसार निर्माण गर्न सकिने पुल खरिद गरी बाढीबाट क्षतिग्रस्त तथा प्रभावित क्षेत्रमा उपलब्ध गराउने योजना रहेको छ।
त्यस्तै, बाढी प्रभावित समुदायका लागि खानेपानी, सरसफाइ, आश्रय, संरक्षण, जीविकोपार्जन तथा हिउँदका आवश्यकतामा थप ८ मिलियन डलर खर्च गरिनेछ। विपद् व्यवस्थापन तथा बाढीपछिको प्रतिकार्य क्षमता अभिवृद्धिका लागि अमेरिकामा निर्मित ड्रोन उपलब्ध गराउन थप १३ मिलियन डलर खर्च गर्ने योजना पनि अमेरिकी पक्षले सार्वजनिक गरेको छ।
नयाँ सहयोग घोषणासँगै नेपालमा बाढी प्रतिकार्य तथा पुनःस्थापनाका लागि अमेरिकाले उपलब्ध गराउने कुल सहायता ३६ मिलियन अमेरिकी डलरभन्दा बढी पुगेको अमेरिकी दूतावासले जनाएको छ। अमेरिकाले नेपाल सरकारसँगको समन्वयमा आवश्यकताको पहिचान गर्दै आगामी दिनमा पनि थप सहयोग उपलब्ध गराउने प्रतिबद्धता जनाएको छ।
