काठमाडौं । जल तथा मौसम विज्ञान विभागले विपद्बाट प्रभावित रसुवा, नुवाकोट, धादिङ र गोरखाका केही स्थानमा भारी वर्षाको सम्भावना रहेको जनाएको छ। विभागको मौसम पूर्वानुमान महाशाखाले विशेष मौसम सूचना जारी गर्दै असोज ७ गते बिहानसम्म ती जिल्लाका एक–दुई स्थानमा भारी वर्षा हुन सक्ने जनाएको हो।
महाशाखाका अनुसार चितवनमा भने मध्यम वर्षाको सम्भावना रहेको छ। गएराति चितवनको कालीखोला वर्षा मापन केन्द्रमा ४१ दशमलव ४ मिलिमिटर वर्षा मापन भएको थियो। महाशाखाले रसुवा, नुवाकोट, धादिङ र गोरखालाई पहेँलो संकेतमा राख्दै मौसमसम्बन्धी आधिकारिक सूचनाबारे नियमित रूपमा अद्यावधिक रहन आग्रह गरेको छ।
भोटेकोशी बाढीपछि क्षतिग्रस्त सडक तथा अन्य पूर्वाधार पुनःस्थापनाको काम भइरहेका बेला ती जिल्लामा पुनः वर्षाको सम्भावना देखिएपछि थप सतर्कता अपनाउन भनिएको हो। वर्षाका कारण नदी तथा खोलानालामा जलसतह बढ्न सक्ने र पहाडी क्षेत्रमा पहिरोको जोखिमसमेत बढ्न सक्ने भएकाले आवश्यक सावधानी अपनाउन महाशाखाले आग्रह गरेको छ।
यसैबीच, बंगालको खाडीमा विकसित भइरहेको न्यूनचापीय प्रणालीका कारण असोज ८ देखि १२ गतेसम्म देशभर वर्षाको गतिविधि बढ्न सक्ने मौसमविद्हरूले बताएका छन्। जल तथा मौसम विज्ञान विभागले उक्त प्रणालीलाई नजिकबाट निगरानी गरिरहेको जनाएको छ। उपलब्ध पूर्वानुमान मोडलहरूमा केही स्थानमा अत्यधिक वर्षाको सम्भावना देखिए पनि यसको प्रभाव र जोखिमको स्तरबारे थप स्पष्ट हुन बाँकी रहेको विभागले जनाएको छ।
वर्षाको सम्भावित जोखिमबारे राष्ट्रिय विपद् जोखिम न्यूनीकरण तथा व्यवस्थापन प्राधिकरणमा आइतबार बसेको मनसुन प्रतिकार्य कमान्ड पोस्टको बैठकमा समेत छलफल भएको थियो। बैठकले वर्षा गराउने मौसमी प्रणालीको निरन्तर निगरानी गर्ने र सम्भावित जोखिमअनुसार आवश्यक तयारी गर्न सम्बन्धित सबै निकायलाई सतर्क गराउने निर्णय गरेको छ।
