काठमाडौं । भोटेकोशी र त्रिशूली नदीमा आएको विनाशकारी बाढीको तेस्रो दिनसम्म पनि बाढीमा कति मानिस परे र कति बेपत्ता छन् भन्ने यकिन विवरण सार्वजनिक हुन सकेको छैन। यद्यपि, सरकारले गरेको प्रारम्भिक प्राविधिक मूल्यांकनले बाढीपछि करिब पाँच हजार मानिस सम्पर्कविहीन भएको देखाएको छ।
गृह मन्त्रालयका एक अधिकारीका अनुसार बाढी आउनुअघि रसुवाको गोसाईंकुण्डदेखि नुवाकोटको देवीघाटसम्मको क्षेत्रमा सक्रिय रहेका करिब पाँच हजार मोबाइल नम्बर बाढीपछि निष्क्रिय देखिएका छन्। नेपाल टेलिकम र एनसेलबाट प्राप्त मोबाइल नेटवर्कसम्बन्धी विवरणका आधारमा प्रारम्भिक विश्लेषण गर्दा उक्त संख्यामा मानिस सम्पर्कविहीन भएको अनुमान गरिएको हो। यद्यपि, मोबाइल बन्द हुनु नै सम्बन्धित व्यक्ति बेपत्ता भएको पुष्टि भने नभएको अधिकारीहरूले बताएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार हालसम्म १ हजार ९२४ जना सम्पर्कविहीन रहेको विवरण प्राप्त भएको छ। सम्पर्कविहीन हुनेमध्ये ९३३ जना विभिन्न जलविद्युत् आयोजनामा कार्यरत कर्मचारी रहेको जनाइएको छ। बाढी र पहिरोका कारण प्रभावित क्षेत्रमा सञ्चार तथा यातायात सेवा अवरुद्ध हुँदा बेपत्ता तथा सम्पर्कविहीन व्यक्तिको यकिन विवरण संकलनमा कठिनाइ भइरहेको छ।
यसैगरी, बाढीपहिरोपछि करिब ५१७ जना विदेशी नागरिकसमेत सम्पर्कविहीन रहेको प्रारम्भिक विवरण छ। उनीहरूको खोजी तथा अवस्थाबारे जानकारी लिन शुक्रबारसम्म करिब दुई हजार निवेदन परेको जनाइएको छ। रसुवा र नुवाकोटका स्थानीय बासिन्दाका साथै गोसाईंकुण्ड भ्रमणमा पुगेका पर्यटकहरूको विवरणसमेत पूर्ण रूपमा संकलन हुन नसकेकाले सम्पर्कविहीनको वास्तविक संख्या अझै बढ्न सक्ने अनुमान गरिएको छ।
सरकारले नेपाल टेलिकम र एनसेलबाट प्राप्त नेटवर्क विवरण, स्थानीय प्रशासन, सुरक्षा निकाय तथा आफन्तबाट प्राप्त सूचनालाई एकीकृत गर्दै बेपत्ता तथा सम्पर्कविहीन व्यक्तिको यकिन विवरण संकलन गर्ने प्रयास गरिरहेको छ। साथै, भोटेकोशी र त्रिशूली नदी आसपासका प्रभावित क्षेत्रमा खोज तथा उद्धार कार्यलाई तीव्रता दिइएको छ।
