काठमाडौं । रसुवाको भोटेकोशीमा आएको विनाशकारी बाढीपछि बेपत्ता भएकाहरूको खोजी तथा प्रभावित नागरिकको उद्धारका लागि सशस्त्र प्रहरी बल, नेपालले थप २ हजार ९८३ सुरक्षाकर्मी परिचालन गरेको छ। यससँगै विपद् प्रतिकार्यमा खटिने सशस्त्र प्रहरीको संख्या ४ हजार ८२८ पुगेको छ।
रसुवा, नुवाकोट, धादिङ, तनहुँ, गोरखा, चितवन, पूर्वी नवलपरासी र पश्चिम नवलपरासीमा विशेष बेस क्याम्प स्थापना गरी दक्ष खोज तथा उद्धारक, शव व्यवस्थापन, शिविर व्यवस्थापन, प्राथमिक उपचार तथा अन्य विज्ञसहितका टोली परिचालन गरिएको सशस्त्र प्रहरीले जनाएको छ। भत्किएका संरचनामा खोज तथा उद्धारका लागि ४४ जनाको सीएसएसआर टोलीसमेत खटाइएको छ।
खोजी कार्यलाई प्रभावकारी बनाउन ७ वटा तालिमप्राप्त कुकुरसहित २१ जनाको ‘के–९’ टोली, पाँचवटा ड्रोनसहितको विशेष ड्रोन स्क्वाड, डोरीबाट उद्धार गर्ने १३ जनाको टोली तथा विभिन्न स्थानमा गोताखोर परिचालन गरिएको छ। साथै, देशका विभिन्न क्षेत्रबाट थप ३५५ जना सशस्त्र प्रहरीलाई तयारी अवस्थामा राखिएको छ।
भोटेकोशी हुँदै त्रिशूली नदी तटीय क्षेत्रमा पर्ने ४८ वटा वडामा सूचीकृत १ हजार २०० विपद् सूचकमार्फत सूचना संकलन भइरहेको छ। प्रभावित नागरिकका लागि आश्रयस्थल व्यवस्थापन, सुरक्षा तथा राहत सामग्री ढुवानीमा समेत सशस्त्र प्रहरी सक्रिय रहेको जनाएको छ।
बाढी आएको दिनदेखि नै नुवाकोटमा विशेषज्ञ चिकित्सकसहित स्वास्थ्य शिविर सञ्चालन भइरहेको छ। घाइतेको आकस्मिक उपचारका लागि काठमाडौंस्थित नेपाल एपीएफ अस्पताल र कुरिनटारस्थित सशस्त्र प्रहरी बलको विपद् व्यवस्थापन तालिम शिक्षालयको ट्रमा सेन्टरमा १००/१०० शय्याको विशेष तयारी गरिएको छ। प्रभावित क्षेत्रमा ऊर्जा आपूर्तिका लागि आठ जेनेरेटर, आवश्यक इन्धन, पाँच सोलार प्यानल र १५ ग्यास सिलिन्डरसहित अत्यावश्यक सामग्रीसमेत पुर्याइएको सशस्त्र प्रहरीले जनाएको छ।
