काठमाडौं । रसुवास्थित भोटेकोशी नदीमा आएको भीषण बाढीले जिल्लाका विभिन्न क्षेत्रमा ठूलो क्षति पुर्याएको छ। तिब्बततर्फबाट आएको बाढीका कारण नेपाल प्रहरीका तीन वटा कार्यालयमा क्षति पुगेको प्रहरी प्रधान कार्यालयले जनाएको छ।
प्रहरी प्रधान कार्यालयका अनुसार बाढीका कारण इलाका प्रहरी कार्यालय टिमुरे, प्रहरी चौकी स्याफ्रुबेँसी र प्रहरी चौकी रसुवागढीमा ठूलो क्षति भएको छ। ती कार्यालय तथा त्यहाँ कार्यरत प्रहरी कर्मचारीहरूको अवस्थाबारे विस्तृत विवरण भने आउन बाँकी रहेको प्रहरीले जनाएको छ।
बाढी तथा पहिरोको जोखिमलाई मध्यनजर गर्दै सरकारले उद्धार तथा राहतका लागि नेपाली सेना, सशस्त्र प्रहरी बल र नेपाल प्रहरी परिचालन गरेको छ। विपद् व्यवस्थापन प्राधिकरणलाई समेत सक्रिय बनाइएको छ।
सरकारले तल्लो तटीय क्षेत्रमा रहेका बासिन्दालाई तत्काल सुरक्षित स्थानमा स्थानान्तरण गर्न सम्बन्धित प्रमुख जिल्ला अधिकारी (सीडीओ)लाई निर्देशन दिएको छ। सम्भावित उद्धार तथा राहत कार्यका लागि आवश्यक पर्ने सबै हेलिकप्टरलाई तयारी अवस्थामा राख्नसमेत भनिएको छ।
यसैबीच, प्रधानमन्त्री बालेन्द्र शाहले उत्पन्न विपद्को अवस्था र सरकारको तयारीबारे छलफल गर्न आपत्कालीन राष्ट्रिय विपद् परिषद्को बैठक बोलाएका छन्। बाढी प्रभावित क्षेत्रमा थप क्षति हुन नदिन तथा उद्धार र राहत कार्यलाई प्रभावकारी बनाउन सुरक्षा निकाय र सम्बन्धित सरकारी संयन्त्र परिचालन गरिएको छ।
