काठमाडौं । भीषण वर्षासँगै आएको बाढीका कारण रसुवाको स्याफ्रुबेँसी, टिमुरेलगायतका क्षेत्रमा ठूलो क्षति भएको जानकारी प्राप्त भएको सञ्चारमन्त्री डा. विक्रम तिमिल्सिनाले बताएका छन्। बाढीबाट भएको क्षतिको विस्तृत विवरण भने आउन बाँकी रहेको जनाइएको छ।
सञ्चारमन्त्री तिमिल्सिनाका अनुसार सरकारले सम्बन्धित सुरक्षा निकाय, जिल्ला प्रशासन कार्यालय, स्थानीय तह, विपद् व्यवस्थापन निकाय तथा अन्य सरोकारवाला निकायलाई उच्च सतर्कता अपनाउन निर्देशन दिइसकेको छ। उद्धार तथा राहतका लागि आवश्यक तयारी अवस्थामा रहन र सम्भावित जोखिम न्यूनीकरणका लागि तत्काल आवश्यक कदम चाल्न पनि निर्देशन दिइएको उनले बताएका छन्।
उनले रसुवा र नुवाकोटका नदी तटीय तथा जोखिमयुक्त क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरेका छन्। नदी किनार तथा पहिरोको जोखिम भएका स्थानमा नजान र अत्यावश्यकबाहेक यात्रा नगर्न आग्रह गर्दै उनले स्थानीय प्रशासन, सुरक्षा निकाय तथा आधिकारिक निकायबाट जारी सूचना र चेतावनीको पालना गर्न अनुरोध गरेका छन्।
यसैबीच, अर्थमन्त्रीको सचिवालयले रसुवाको टिमुरे र स्याफ्रुबेँसी आसपास केही घण्टाअघि भीषण वर्षाका कारण ठूलो बाढी आएको जानकारी दिएको छ। सचिवालयका अनुसार भन्सार कार्यालय तथा मातहतका निकायसँग समन्वय गर्दै अर्थमन्त्री डा. स्वर्णिम वाग्ले, मन्त्रालयका सचिव डा. घनश्याम उपाध्याय, भन्सार विभागका महानिर्देशक यमलाल भुसालसहितको उच्चस्तरीय नेतृत्वले खोज तथा उद्धारलगायतका काममा आवश्यक समन्वय गरिरहेको छ।
सरकारले अवस्था अझै विकसित हुन सक्ने भन्दै नागरिकलाई अफवाहको पछि नलागी आधिकारिक सूचनामा मात्र विश्वास गर्न आग्रह गरेको छ। साथै, जोखिममा रहेका व्यक्तिलाई सचेत गराउन र आपत्कालीन अवस्था सिर्जना भए तत्काल सम्बन्धित निकायलाई जानकारी गराउन अनुरोध गरिएको छ।
