काठमाडौं । संघीय संसद् प्रतिनिधि सभाको दोस्रो अधिवेशनअन्तर्गत सोमबार बस्ने बैठकमा विभिन्न पाँचवटा विषयलाई कार्यसूचीमा राखिएको छ। दिउँसो १ बजे बस्ने बैठकमा मन्त्रालयगत प्रश्नोत्तर तथा विधेयकसम्बन्धी प्रक्रिया अघि बढाइने संसद् सचिवालयले जनाएको छ।
बैठकमा उद्योग, वाणिज्य तथा आपूर्ति मन्त्रालयसम्बन्धी मौखिक प्रश्नको सम्बन्धित मन्त्रीले उत्तर दिने कार्यक्रम रहेको छ। त्यसपछि बैठक व्यवस्थापनअन्तर्गत विभिन्न विधेयकलाई सम्बन्धित समितिमा पठाउने प्रस्ताव पेस हुने कार्यसूची तय गरिएको छ।
प्रधानमन्त्री बालेंन शाहको तर्फबाट अर्थमन्त्री डा. स्वर्णिम वाग्लेले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव पेस गर्ने कार्यसूचीमा उल्लेख छ।
त्यस्तै, परराष्ट्रमन्त्री शिशिर खनालले ‘राहदानी (पहिलो संशोधन) विधेयक, २०८३’ तथा महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्री सीता बादीले ‘मानव बेचबिखन तथा ओसारपसार (नियन्त्रण) (पहिलो संशोधन) विधेयक, २०८३’ लाई दफावार छलफलका लागि सम्बन्धित समितिमा पठाउने प्रस्ताव पेस गर्नेछन्।
यसैगरी उद्योग, वाणिज्य तथा आपूर्तिमन्त्री गौरी कुमारीले ‘खानी तथा खनिज पदार्थ विधेयक, २०८३’ लाई दफावार छलफलका लागि सम्बन्धित समितिमा पठाउने प्रस्ताव पेस गर्ने कार्यसूची रहेको छ। प्रतिनिधि सभा सचिव पद्म प्रसाद पाण्डेयद्वारा जारी सम्भावित दैनिक कार्यसूचीअनुसार यी प्रस्तावहरू बैठकमा अघि बढाइनेछन्।
