काठमाडौँ । नागपञ्चमीका अवसरमा काठमाडौँ उपत्यकाका प्रमुख नागस्थलहरूमा बिहानैदेखि भक्तजनको घुइँचो लागेको छ। पशुपतिनाथ मन्दिरस्थित वासुकिनाथ मन्दिर, काठमाडौँ महानगरपालिका–१ स्थित नागपोखरी तथा कीर्तिपुरको टौदहमा भक्तजनले पूजा, आराधना तथा दर्शन गरिरहेका छन्।
पशुपति क्षेत्र विकास कोषका अनुसार वासुकिनाथ मन्दिर बिहान ३ बजेदेखि नै भक्तजनका लागि खुला गरिएको हो। मन्दिरमा विशेष पूजा तथा आराधना हुने भएकाले बिहानैदेखि दर्शनार्थीको लाम लागेको कोषका पुरातत्व अधिकृत सुशीलकुमार गौतमले जानकारी दिए। चान्द्रमासअनुसार श्रावण महिनाको तेस्रो सोमबारसमेत परेकाले पशुपति क्षेत्रमा भक्तजनको चाप थप बढेको छ। बागमती नदीको शिरोभाग सुन्दरीजलबाट शुद्ध जल ल्याएर पशुपतिनाथलाई अर्पण गर्ने बोलबम यात्रीको समेत बाक्लो उपस्थिति रहेको छ।
त्यसैगरी, काठमाडौँ महानगरपालिका–१ स्थित नागपोखरीमा बिहानै नित्य पूजा सम्पन्न गरी भक्तजनका लागि पोखरी खुला गरिएको छ। वडा सदस्य रोशन श्रेष्ठका अनुसार नागपञ्चमीका अवसरमा नागपोखरीमा विशेष मेलासमेत आयोजना गरिएको छ। भक्तजनले नागको पूजा तथा आराधना गर्दै धार्मिक विधिअनुसार नागपञ्चमी मनाइरहेका छन्।
कर्कोटक नागराजा र नागरानीको निवासका रूपमा धार्मिक तथा सांस्कृतिक महत्व बोकेको कीर्तिपुरको टौदहमा पनि बिहानैदेखि स्थानीयवासी तथा अन्य भक्तजनको भीड लागेको छ। नित्यपूजापछि भक्तजनका लागि टौदह खुला गरिएको स्थानीय उपेन्द्र नेपालले बताए। टौदहमा परम्परादेखि जलयज्ञ विधिबाट नाग–नागिनीको पूजा हुँदै आए पनि विसं २०७० पछि उक्त विधि बन्द भएको थियो। विसं २०७२ मा एकपटक जलयज्ञ विधिबाट पूजा गरिए पनि पछिल्लो समय यो परम्परा लोप हुने जोखिम बढेको स्थानीयको भनाइ छ। टौदहको व्यवस्थापन कर्कोटक नागराजा नागरानी व्यवस्थापन समाजले गर्दै आएको छ।
