भक्तपुर । नेपाल रेडक्रस सोसाइटी भक्तपुर जिल्ला शाखाका सभापति रामेश्वर थापाको सभापतित्वमा जिल्ला शाखा तथा विभिन्न उपशाखाबीच परिचयात्मक एवं छलफल कार्यक्रम सम्पन्न भएको छ। कार्यक्रमले जिल्ला शाखा र उपशाखाबीच आपसी सम्बन्धलाई थप सुदृढ बनाउने तथा संस्थागत सहकार्यलाई प्रभावकारी बनाउने उद्देश्य राखेको थियो।
कार्यक्रममा सहभागी पदाधिकारी तथा प्रतिनिधिहरूले परिचय आदानप्रदान गर्दै शाखाहरूले सञ्चालन गरिरहेका गतिविधि, अनुभव तथा चुनौतीबारे आफ्ना धारणा राखेका थिए। साथै, रेडक्रस अभियानलाई अझ प्रभावकारी बनाउन आवश्यक समन्वय, सहकार्य र साझा योजनाबारे अन्तरक्रिया गरिएको थियो।
छलफलका क्रममा समसामयिक विषयहरूमा समेत विचार–विमर्श गर्दै जिल्ला शाखा र उपशाखाबीच नियमित संवाद, सूचना आदानप्रदान तथा संयुक्त कार्यक्रम सञ्चालनलाई प्राथमिकता दिने विषयमा जोड दिइएको थियो। सहभागीहरूले स्थानीय तहसम्म रेडक्रसका मानवीय सेवा अझ प्रभावकारी रूपमा विस्तार गर्न एकीकृत प्रयास आवश्यक रहेको बताएका थिए।
सभापति रामेश्वर थापाले जिल्ला शाखा र उपशाखाबीचको एकता, सहकार्य र पारस्परिक विश्वास नै संस्थाको सफलताको आधार भएको उल्लेख गर्दै आगामी दिनमा सबै उपशाखासँग समन्वयलाई अझ सुदृढ बनाइने विश्वास व्यक्त गरे। कार्यक्रमले भविष्यमा संयुक्त रूपमा मानवीय सेवा, विपद् व्यवस्थापन तथा समुदायमुखी कार्यक्रम सञ्चालनमा थप प्रभावकारी सहकार्य गर्ने प्रतिबद्धता व्यक्त गर्दै सम्पन्न भएको थियो।
