काठमाडौं । देशका विभिन्न जिल्लामा पहिरो, बाढी र अविरल वर्षाका कारण मंगलबार बिहान ५ बजेसम्म प्रमुख राजमार्गका विभिन्न खण्ड प्रभावित भएका छन्। नेपाल प्रहरीले सार्वजनिक गरेको पछिल्लो विवरणअनुसार काठमाडौं उपत्यका, कोशी र बागमती प्रदेशका केही सडक पूर्ण रूपमा अवरुद्ध भएका छन् भने केही स्थानमा एकतर्फी मात्र सवारी सञ्चालन भइरहेको छ।
उपत्यकाअन्तर्गत ललितपुरको बागमती गाउँपालिका–३ पाण्डेडाँडास्थित कान्तिलोकपथ सडकखण्ड पहिरोका कारण पूर्ण रूपमा बन्द भएको छ। यस्तै, काठमाडौंको नागार्जुन नगरपालिका–८ ठुलोखेलस्थित सितापाइला–धार्के सडकखण्ड पनि पहिरोका कारण पूर्ण रूपमा अवरुद्ध रहेको प्रहरीले जनाएको छ।
कोशी प्रदेशमा भोजपुर नगरपालिका–५ बोखिम क्षेत्रमा आएको बाढीका कारण मध्यपहाडी लोकमार्गमा एकतर्फी सवारी सञ्चालन भइरहेको छ। इलाम नगरपालिका–९ राजदुवाली क्षेत्रमा झापा–ताल्तेजुङ सडकखण्डअन्तर्गत मेची राजमार्ग भने अविरल वर्षाका कारण पूर्ण रूपमा अवरुद्ध भएको छ। उक्त क्षेत्रमा वैकल्पिक मार्ग प्रयोग गर्न सकिने प्रहरीले जनाएको छ।
बागमती प्रदेशमा काभ्रेको खुर्कोट–नेपालथोक–कटुञ्जेबेंसी सडकखण्डमा सम्भावित बाढीको जोखिमका कारण साँझ ६ बजेदेखि बिहान ४ बजेसम्म सबै प्रकारका सवारी सञ्चालन रोकिएको छ। यस्तै, मकवानपुरको हेटौंडा–भिमफेदी–बागमती–ललितपुर हुँदै जाने कान्तिलोकपथमा पनि राति ११ बजेदेखि बिहान ५ बजेसम्म सवारी आवागमन बन्द गरिएको छ।
त्यसैगरी, सिन्धुपाल्चोकको भोटेकोशी गाउँपालिका–४ चारकिलो (तातोपानी जाने बाटो) र गाउँपालिका–२ कोदारी क्षेत्रमा पहिरोका कारण अर्निको राजमार्ग पूर्ण रूपमा अवरुद्ध भएको छ। नेपाल प्रहरीले यात्रा अघि सम्बन्धित सडकको अवस्थाबारे जानकारी लिन, वैकल्पिक मार्ग प्रयोग गर्न तथा आवश्यक सावधानी अपनाउन सबै यात्रुलाई आग्रह गरेको छ।
