काठमाडौं । भक्तपुरका स्ववासी तथा अव्यवस्थित बसोबासीका समस्या समाधानका विषयमा भूमि व्यवस्था, सहकारी तथा गरिबी निवारण मन्त्रालय र संघीय मामिला तथा सामान्य प्रशासन मन्त्रालयको जिम्मेवारी सम्हालिरहेकी मन्त्री प्रतिभा रावलसँग आज विस्तृत छलफल गरिएको छ। छलफलमा भक्तपुरका स्ववासी तथा अव्यवस्थित बसोबासीले भोगिरहेका समस्या, जग्गाधनी प्रमाणपत्र वितरण तथा दीर्घकालीन समाधानका उपायबारे विशेष रूपमा कुराकानी भएको जनाइएको छ।
भेटमा भक्तपुरका पर्ती (सार्वजनिक) जग्गाको संरक्षण, स्थानीय तहबाट भएको भनिएको अधिकार दुरुपयोग तथा त्यसका कारण उत्पन्न विवादबारे पनि ध्यानाकर्षण गराइएको थियो। साथै सहकारी पीडितहरूले भोगिरहेका समस्याको समाधानका लागि सरकारले प्रभावकारी पहल गर्नुपर्ने विषय पनि उठाइएको बताइएको छ।
छलफलको क्रममा मन्त्री प्रतिभा रावलले सुकुम्बासी समस्या समाधानलाई आफ्नो कार्यकालको प्रमुख प्राथमिकतामा राखेको बताइन्। उनले सरकारले कानुन र नीतिअनुसार वास्तविक भूमिहीन तथा अव्यवस्थित बसोबासीको समस्या समाधानतर्फ दृढतापूर्वक अघि बढ्ने प्रतिबद्धता व्यक्त गरिन्।
भेटघाटको अन्त्यमा मन्त्री रावलले, “म यो मन्त्रालयबाट फर्किँदा सुकुम्बासी समस्या पूर्ण रूपमा समाधान गरेर ‘सुकुम्बासी’ भन्ने शब्दलाई शब्दकोषमा मात्र सीमित गराउने छु,” भन्दै सरकारको लक्ष्य स्पष्ट रूपमा प्रस्तुत गरेकी थिइन्। उनको उक्त अभिव्यक्तिलाई उपस्थितहरूले सकारात्मक प्रतिबद्धताका रूपमा लिएको जनाइएको छ।
छलफलमा सहभागी पक्षले नागरिकको न्याय, भूमिसम्बन्धी अधिकारको सुनिश्चितता तथा सहकारी पीडितलाई न्याय दिलाउने विषयमा मन्त्री रावलले देखाएको प्रतिबद्धताको स्वागत गर्दै सफल कार्यकालका लागि शुभकामना व्यक्त गरेका छन्। उनीहरूले भक्तपुरका स्ववासी तथा अव्यवस्थित बसोबासीको समस्या शीघ्र समाधान हुने अपेक्षा समेत व्यक्त गरेका छन्।
