काठमाडौं । युवा अभियन्ता डा. अबुल हुसेन अन्सारीले नेपालमा गैरकानुनी रूपमा बसोबास गरिरहेका भनिएका रोहिङ्ग्या तथा यससँग जोडिएका विषयमा सत्यतथ्य सार्वजनिक गर्न उच्चस्तरीय निष्पक्ष छानबिन आयोग गठन गर्न सरकारसँग माग गरेका छन्। उनले सामाजिक सञ्जालमार्फत प्रधानमन्त्री बालेन शाह र गृहमन्त्री सुधन गुरुङलाई सम्बोधन गर्दै यस्तो आग्रह गरेका हुन्।
अन्सारीले सुनसरी घटनाको सन्दर्भमा सम्पूर्ण मुस्लिम समुदायमाथि प्रमाणबिनै आरोप लगाइनु उचित नभएको उल्लेख गर्दै आवश्यक परे मुस्लिम समुदायको तीन पुस्तेसम्मको छानबिन गर्न आफूबाटै प्रक्रिया सुरु गर्न सरकारलाई आग्रह गरेका छन्। उनले तथ्य र प्रमाणका आधारमा मात्रै निष्कर्षमा पुग्नुपर्नेमा जोड दिएका छन्।
उनले देशभरका जनप्रतिनिधिको सहभागितामा निष्पक्ष छानबिन समिति गठन गरी वास्तविक तथ्य संकलन गर्नुपर्ने धारणा राखेका छन्। भाषण, आरोप–प्रत्यारोप र राजनीतिक स्टन्टभन्दा प्रमाणमा आधारित अनुसन्धानमार्फत सत्य सार्वजनिक गर्नुपर्ने उनको भनाइ छ।
अन्सारीले सरकारले अवैध रूपमा नेपालमा बसोबास गरिरहेका व्यक्तिबारे दाबी गरेको भए कानुनअनुसार अनुसन्धान गरी वास्तविक तथ्य सार्वजनिक गर्नुपर्ने बताएका छन्। साथै, विगतमा वितरण गरिएका नागरिकता, नेपालमा रहेका रोहिङ्ग्या शरणार्थीको आधिकारिक तथ्यांक तथा यससम्बन्धी सरकारी निर्णयहरूको पनि निष्पक्ष समीक्षा गर्नुपर्ने माग गरेका छन्।
उनले मुस्लिम समुदायका अगुवाहरूले पनि बाहिरबाट आएका व्यक्तिहरूको कानुनी छानबिनमा सहयोग गर्नुपर्ने र जनप्रतिनिधिहरूले आफ्ना निर्वाचन क्षेत्रमा पुगेर वास्तविक अवस्था बुझ्नुपर्ने बताएका छन्। देशलाई भ्रम, अफवाह, राजनीतिक स्वार्थ र धार्मिक विभाजनभन्दा माथि उठाएर सत्य, कानुनी शासन, राष्ट्रिय एकता र सामाजिक सद्भावतर्फ अघि बढाउन सरकारसँग उनले आग्रह गरेका छन्।
