काठमाडौ । वि.सं. २०४८ असार १६ गतेदेखि नेपाल निजामती कर्मचारी संगठनको नेतृत्वमा निजामती कर्मचारीहरू पेसागत अधिकार, तलब–सुविधा तथा स्वाभिमानको रक्षाका लागि देशव्यापी आन्दोलनमा उत्रिएका थिए। तत्कालीन सरकारले आन्दोलनलाई नियन्त्रण गर्न कडा नीति अपनाए पनि आन्दोलन झन् सशक्त बन्दै गएको थियो। यो आन्दोलन नेपालको निजामती कर्मचारी इतिहासकै महत्त्वपूर्ण र लामो आन्दोलनमध्ये एक मानिन्छ, जुन करिब ५६ दिनसम्म सञ्चालन भएको थियो।
यसै आन्दोलनको क्रममा वि.सं. २०४८ साउन १५ गते खोटाङको दिक्तेलमा निकालिएको शान्तिपूर्ण प्रदर्शनका क्रममा प्रहरीले गोली चलाएको थियो। नेपाल निजामती कर्मचारी संगठनका तत्कालीन अध्यक्ष नारायणप्रसाद जोशीका सुपुत्र तथा विद्यार्थी मनोज जोशी कर्मचारी आन्दोलनप्रति ऐक्यबद्धता जनाउन जुलुसमा सहभागी भएका बेला प्रहरीको गोली लागेर घटनास्थलमै सहादत प्राप्त गरेका थिए। मनोज जोशीको बलिदानले कर्मचारी आन्दोलनलाई थप उचाइमा पुर्याएको इतिहासमा थियाे।
कर्मचारी आन्दोलनका क्रममा खोटाङका मनोज जोशीसँगै पोखराका झपेन्द्र कार्की र मुगुका सुरेन्द्र विश्वकर्माले पनि सहादत प्राप्त गरेका थिए। उनीहरूको त्याग र बलिदानलाई सम्मान गर्दै नेपाल सरकारले वि.सं. २०७४ माघ २२ गते उनीहरूलाई राष्ट्रिय शहीद घोषणा गरेको थियो। नेपाल निजामती कर्मचारी आन्दोलनको इतिहासमा यी तीन शहीदको योगदानलाई पेसागत अधिकार र ट्रेड युनियन आन्दोलनको प्रेरणादायी अध्यायका रूपमा स्मरण गरिन्छ।
आज मनोज जोशीले सहादत प्राप्त गरेको ३५ वर्ष पूरा भएको अवसरमा देशका विभिन्न स्थानमा उहाँसहित आन्दोलनका शहीदहरूको सम्झना गरिएको छ। कर्मचारी संगठन, विभिन्न सामाजिक संघसंस्था तथा नागरिक समाजले उहाँहरूको योगदानको सम्मान गर्दै शहीदहरूले देखाएको साहस, त्याग र लोकतान्त्रिक अधिकारका लागि गरिएको संघर्ष नेपाली समाजका लागि सधैं प्रेरणाको स्रोत रहने छ।
शहीदहरू भौतिक रूपमा आज हामीबीच नरहे पनि उनीहरूले देखाएको पेसागत स्वाभिमान, अधिकारको रक्षा र न्यायपूर्ण सेवाप्रतिको प्रतिबद्धता नेपाली निजामती कर्मचारी आन्दोलनको अमूल्य विरासत बनेको छ। उनीहरूको बलिदानले स्थापित गरेका मूल्य र आदर्शलाई आत्मसात् गर्दै पेसागत सम्मान, सुशासन र जनउत्तरदायी सार्वजनिक सेवाको लक्ष्यतर्फ अघि बढ्नु नै उहाँहरूप्रतिको सच्चा श्रद्धाञ्जलि हुने विश्वास व्यक्त गरिएको छ।
