काठमाडौं । प्रधानमन्त्री वालेन्द्र (बालेन) शाहले वर्तमान सरकार हिन्दू राष्ट्र र राजतन्त्र पुनःस्थापनाको पक्षमा नरहेको स्पष्ट पार्दै संघीय लोकतान्त्रिक गणतन्त्रप्रति सरकार प्रतिबद्ध रहेको बताएका छन्। शुक्रबार मधेशकेन्द्रित राजनीतिक दलका नेताहरूसँग भएको करिब दुई घण्टाको छलफलमा उनले हिन्दू राष्ट्रको मुद्दासँग राजतन्त्रको विषय पनि जोडिने भएकाले सरकार त्यस दिशामा नजाने धारणा व्यक्त गरेका हुन्।
छलफलमा सहभागी नेताहरूका अनुसार प्रधानमन्त्री शाहले तराई–मधेस र पहाडमा हिन्दू राष्ट्रको मागका पछाडि फरक–फरक सन्दर्भ र भावना रहेको उल्लेख गर्दै वर्तमान अवस्थामा राजतन्त्र पुनःस्थापना उपयुक्त नहुने बताएका थिए। उनले संघीयताको कार्यान्वयनप्रति सरकारको प्रतिबद्धता दोहोर्याउँदै त्यसलाई कमजोर हुने कुनै पनि कदम नचालिने स्पष्ट पारे।
जनता समाजवादी पार्टी नेपालका महासचिव रामकुमार शर्माले प्रधानमन्त्रीको धारणा हिन्दू राष्ट्र र राजतन्त्रका विषयमा स्पष्ट रहेको बताए। त्यस्तै, राष्ट्रिय मुक्ति पार्टी नेपालका अध्यक्ष राजेन्द्र महतोका अनुसार प्रधानमन्त्रीले आफू र सरकार संघीय शासन व्यवस्थाप्रति दृढ रहेको तथा छानबिन प्रतिवेदनका आधारमा दोषीमाथि कानुनी कारबाही गरिने र पीडितसँग भएका सम्झौताहरू कार्यान्वयन गरिने प्रतिबद्धता व्यक्त गरेका थिए।
प्रधानमन्त्री शाहले पछिल्ला दिनमा तराई–मधेसमा देखिएको साम्प्रदायिक तनावप्रति चिन्ता व्यक्त गर्दै केही स्वार्थ समूहले धार्मिक तथा साम्प्रदायिक सद्भाव बिगार्ने प्रयास गरिरहेको बताए। उनले यस्तो गतिविधिविरुद्ध सबै राजनीतिक दल, सामाजिक अगुवा र नागरिक एकजुट भएर शान्ति, सद्भाव र राष्ट्रिय एकताको पक्षमा उभिनुपर्ने आवश्यकता औँल्याए।
छलफलका क्रममा मधेशकेन्द्रित दलका नेताहरूले विगतमा भएका विभिन्न सम्झौताहरू कार्यान्वयन नभएको विषय उठाउँदै सुनसरीमा गृहमन्त्रीको उपस्थितिमा भएको सहमतिसहित सबै प्रतिबद्धता प्रभावकारी रूपमा लागू गर्न सरकारको ध्यानाकर्षण गराएका थिए। जवाफमा प्रधानमन्त्री शाहले सरकारले जनतासँग गरेका प्रतिबद्धताहरू पूरा गर्दै मुलुकमा शान्ति, विश्वास र परिवर्तनको अनुभूति दिलाउने गरी काम गर्ने विश्वास दिलाएका थिए।
