काठमाडौं । देशको तराई क्षेत्रमा धार्मिक द्वन्द्वबाट उत्पन्न विवादका विषयमा राष्ट्रका नाममा सम्बोधन गर्नुभएका सम्माननीय प्रधानमन्त्री वालेन्द्र शाहले त्यसलगत्तै राष्ट्रपति रामचन्द्र पौडेलसँग भेटवार्ता गर्नुभएको छ। राष्ट्रपति निवास शीतल निवासमा भएको भेटमा उहाँहरूबीच मुलुकको पछिल्लो अवस्था, शान्ति–सुरक्षा तथा समसामयिक विषयमा छलफल भएको थियो।
राष्ट्रपतिसँगको भेटपछि प्रधानमन्त्री शाहले आज सम्माननीय उपराष्ट्रपति रामसहायप्रसाद यादवसँग पनि टेलिफोनमार्फत संवाद गर्नुभएको छ। प्रधानमन्त्री र उपराष्ट्रपतिबीच देशको वर्तमान अवस्था तथा पछिल्ला घटनाक्रमबारे विचार आदान–प्रदान भएको जनाइएको छ।
टेलिफोन संवादका क्रममा विशेषगरी तराई क्षेत्रमा देखिएको धार्मिक विवाद, त्यसबाट उत्पन्न परिस्थितिको व्यवस्थापन तथा सामाजिक सद्भाव कायम राख्ने विषयमा छलफल भएको बताइएको छ। साथै राष्ट्रिय हितका सवालमा सबै संवैधानिक निकायबीच आपसी समन्वय र सहकार्यलाई प्रभावकारी बनाउने विषयमा पनि विचार–विमर्श भएको थियो।
प्रधानमन्त्रीले राष्ट्रका नाममा सम्बोधनमार्फत सबै नागरिकलाई संयम अपनाउन, अफवाहको पछि नलाग्न तथा सामाजिक सद्भाव, धार्मिक सहिष्णुता र राष्ट्रिय एकतालाई कायम राख्न आग्रह गर्नुभएको थियो। त्यसपछि राष्ट्रपतिसँगको भेट र उपराष्ट्रपतिसँगको संवादलाई वर्तमान परिस्थितिमा उच्च तहको राजनीतिक तथा संवैधानिक समन्वयका रूपमा हेरिएको छ।
प्रधानमन्त्रीको सचिवालयका अनुसार राष्ट्रपति र उपराष्ट्रपतिसँग भएका छलफल तथा संवाद सौहार्दपूर्ण वातावरणमा सम्पन्न भएका छन्। सरकारले वर्तमान अवस्थालाई शान्तिपूर्ण ढंगले समाधान गर्दै राष्ट्रिय एकता, सामाजिक सद्भाव र जनसुरक्षालाई प्राथमिकतामा राखेर आवश्यक कदम अघि बढाइरहेको जनाएको छ।
