काठमाडौं । श्रम संस्कृति पार्टीका अध्यक्ष हर्क साम्पाङले वर्तमान सरकार असफल भएको दाबी गर्दै अब सरकारको विकल्प खोज्नुपर्ने समय आएको बताएका छन्। उनले बुधबार सामाजिक सञ्जाल फेसबुकमार्फत सरकारको कार्यशैलीप्रति असन्तुष्टि जनाउँदै यस्तो धारणा सार्वजनिक गरेका हुन्।
साम्पाङले आफ्नो फेसबुक स्टाटसमा देशको समग्र अवस्था सन्तोषजनक नरहेको उल्लेख गर्दै सरकारबाट कुनै सकारात्मक समाचार आउन नसकेको टिप्पणी गरेका छन्। उनले “सर्वत्र सरकार असफल, अब विकल्पको खोजी गर्नु नै उत्तम होला। देयर इज नो गुड न्युज एट अल,” भन्दै सरकारप्रति कटाक्ष गरेका छन्।
उनको भनाइ सार्वजनिक भइरहँदा देशमा विभिन्न विषयलाई लिएर असन्तुष्टि, विरोध प्रदर्शन तथा राजनीतिक बहस तीव्र बन्दै गएको छ। पछिल्ला घटनाक्रमका कारण सरकारको कार्यक्षमता र निर्णय प्रक्रियामाथि विभिन्न तहबाट प्रश्न उठिरहेका छन्।
यद्यपि, साम्पाङले सरकारको विकल्पका रूपमा कुन शक्ति वा राजनीतिक व्यवस्था उपयुक्त हुने भन्ने विषयमा भने कुनै स्पष्ट धारणा सार्वजनिक गरेका छैनन्। उनको अभिव्यक्तिलाई लिएर सामाजिक सञ्जालमा मिश्रित प्रतिक्रिया देखिएको छ।
पछिल्लो समय सामाजिक तथा राजनीतिक विषयमा खुला धारणा राख्दै आएका साम्पाङका अभिव्यक्तिहरूले बेला–बेलामा सार्वजनिक बहस सिर्जना गर्ने गरेका छन्। यसपटक पनि सरकारको विकल्प खोज्नुपर्ने उनको भनाइले राजनीतिक वृत्तमा थप चर्चा सुरु भएको छ।
