काठमाडौं । सङ्घीय संसद् सचिवालयका अनुसार प्रतिनिधिसभाको बैठक आज बिहान ११ः०० बजे संघीय संसद् भवन, नयाँ बानेश्वरमा बस्ने भएको छ। बैठकमा सरकारका तर्फबाट महत्त्वपूर्ण विधेयक प्रस्तुत गरिनुका साथै संसद्का पूर्वसदस्य एवं संविधानसभा सदस्य स्वर्गीय गोपालमान श्रेष्ठप्रति श्रद्धाञ्जली अर्पण गर्दै शोक प्रस्ताव पेश गरिने कार्यसूची रहेको छ।
बैठकमा अर्थमन्त्री डा. स्वर्णिम वाग्लेले ‘अर्थसम्बन्धी केही नेपाल कानुनलाई संशोधन र खारेज गर्ने विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नेछन्। उक्त विधेयकमार्फत आर्थिक तथा राजस्व व्यवस्थासँग सम्बन्धित विभिन्न कानुनी व्यवस्थामा आवश्यक संशोधन तथा खारेजी गर्ने उद्देश्य राखिएको छ। प्रस्ताव स्वीकृत भएमा सम्बन्धित समितिमा विस्तृत अध्ययन तथा छलफलपछि प्रतिवेदनसहित पुनः प्रतिनिधिसभामा पेश गरिनेछ।
यस्तै, सभामुख डोलप्रसाद अर्यालले नेपाली कांग्रेसका वरिष्ठ नेता, प्रतिनिधिसभाका पूर्वसदस्य तथा संविधानसभा सदस्य स्वर्गीय गोपालमान श्रेष्ठको निधनप्रति शोक प्रस्ताव प्रस्तुत गर्ने कार्यसूची रहेको छ। शोक प्रस्तावमार्फत संसद्ले दिवंगत श्रेष्ठले लोकतान्त्रिक आन्दोलन, संविधान निर्माण र संसदीय अभ्यासमा पुर्याएको योगदानको स्मरण गर्दै श्रद्धाञ्जली अर्पण गर्नेछ। शोक प्रस्तावपछि बैठकमा केही समय मौनधारण गरिने संसदीय परम्परा रहेको छ।
यसैबीच, सङ्घीय संसद्अन्तर्गतको विधायन व्यवस्थापन समिति को बैठक पनि आज बिहान ११ः०० बजे बस्ने भएको छ। समितिको बैठकमा ‘सङ्घीयतामा विधायिकी अन्तरसम्बन्धः नेपालमा अभ्यास, आवश्यकता र चुनौती’ विषयमा अभिमुखीकरण कार्यक्रम सञ्चालन हुने कार्यसूची छ। कार्यक्रममा सङ्घीय, प्रदेश र स्थानीय तहबीचको विधायिकी समन्वय, कानुन निर्माण प्रक्रियामा देखिएका चुनौती तथा सुधारका उपायबारे विज्ञहरूबाट प्रस्तुति हुने जनाइएको छ।
आजका संसदीय गतिविधिलाई संसद्को चालु अधिवेशनका महत्त्वपूर्ण कार्यक्रमका रूपमा हेरिएको छ। प्रतिनिधिसभाको बैठक र समितिको छलफलबाट आर्थिक कानुन सुधार, संसदीय प्रक्रिया तथा सङ्घीय शासन प्रणालीलाई थप प्रभावकारी बनाउने विषयमा महत्वपूर्ण छलफल हुने अपेक्षा गरिएको छ।
