काठमाडौं। प्रधानमन्त्री बालेन शाहले सुनसरीको देवानगञ्ज क्षेत्रमा भएको हिंसात्मक घटनाप्रति गहिरो दुःख व्यक्त गर्दै मृतकप्रति श्रद्धाञ्जली अर्पण गर्नुभएको छ। उहाँले घाइतेहरूको शीघ्र स्वास्थ्यलाभको कामना गर्दै पीडित परिवारलाई न्याय, क्षतिपूर्ति र दोषीमाथि कानुनबमोजिम कारबाही गरिने प्रतिबद्धता जनाउनुभएको छ।
सामाजिक सञ्जाल फेसबुकमार्फत सार्वजनिक सन्देशमा प्रधानमन्त्री शाहले आफू प्रधानमन्त्रीका रूपमा मात्र नभई यस देशको नागरिकका रूपमा पनि सुनसरीको घटनाबाट अत्यन्त दुःखी भएको उल्लेख गर्नुभएको छ। उहाँले सामान्य विवादबाट सुरु भएको घटनाले हिंसात्मक रूप लिँदा ज्यान गुम्ने, समाजमा डर र अविश्वास फैलिने अवस्था सिर्जना हुनु दुःखद भएको बताउनुभएको छ।
प्रधानमन्त्री शाहले घटनाको सुरुवातदेखि नै सरकारले सक्रिय रूपमा काम गरेको भए पनि त्यसले अपेक्षित परिणाम दिन नसकेको स्वीकार गर्नुभएको छ। सुरक्षाकर्मीको गोली लागेर नागरिकको ज्यान जानु र घाइते हुनु सामान्य विषय नभएको उल्लेख गर्दै उहाँले यसबारे अनुसन्धान सुरु भइसकेको र दोषीमाथि कानुनअनुसार कारबाही हुने विश्वास व्यक्त गर्नुभएको छ। साथै सरकारले सम्पूर्ण घटनाको गम्भीर समीक्षा गरिरहेको जानकारी पनि दिनुभएको छ।
उहाँले मृतकका परिवार तथा घाइतेलाई न्यायको अनुभूति गराउन सरकारले आफ्नो सम्पूर्ण शक्ति प्रयोग गर्ने बताउँदै घटनाबाट पाठ सिकेर भविष्यमा यस्ता घटना दोहोरिन नदिन आवश्यक निर्णयहरू तत्काल कार्यान्वयन गरिने स्पष्ट पार्नुभएको छ। सरकारले पीडितलाई न्याय र क्षतिपूर्ति दिलाउने दायित्व पूरा गर्ने उहाँको भनाइ छ।
प्रधानमन्त्री शाहले सबै नागरिकलाई संयम अपनाउन आग्रह गर्दै उत्तेजना, आक्रोश र बदलाको भावनामा नबग्न अपिल गर्नुभएको छ। धर्म, जात वा समुदायका आधारमा विभाजित नभई मानवता, प्रेम, सम्मान र सामाजिक सद्भाव कायम राख्नुपर्नेमा जोड दिँदै उहाँले नागरिकको सुरक्षा सुनिश्चित गर्नु सरकारको पहिलो दायित्व रहेको उल्लेख गर्नुभएको छ।
यस्ताे छ प्रधानमन्त्री बालेनकाे फेसबुकमा :
नमस्कार । मलाई थाहा छ, मन दुख्नु सामान्य कुरा होइन । तर सुनसरीमा भएको सामान्य घटनामा मन दुखेको कुराबाट आक्रोशित हुँदा ज्यान गुम्ने अवस्था पुग्यो । समाज भाँडिने र एकले अर्कोलाई देख्दा डराउने अवस्थामा पुग्यो । मानवता बोकेको कसैले पनि चाहेको अवस्था यस्तो होइन । तर पनि घटनाक्रमहरू अशान्त भए ।
प्रधानमन्त्रीकारूपमा मात्र होइन, यहि देशका नागरिककारूपमा म सुनसरीमा भएका घटनाक्रमबाट दुखी छु । मृतकप्रति हार्दिक श्रद्धाञ्जली व्यक्त गर्दछु । घाइतेहरूको चाँडो स्वास्थ्य ठिक होस् भन्ने कामना गर्दछु । यो घटनाबाट गुमाएका परिवारहरूको दुख मैले महसुस गरेको छु । सरकारले सक्दो चाँडो न्याय र क्षतिपूर्ति उपलब्ध गराउनेछ । फेरि त्यस्तो नहोस् भन्नका लागि यसका कसुरदारहरूलाई कानुन बमोजिम कारबाही गरिने विश्वास दिलाउन चाहन्छु ।
यो घटनाबाट हामीले पाठ सिकेर फेरि यस्ता घटना हुन नदिन सरकारले तत्काल आवश्यक निर्णय गरिरहेको छ । घटनाको सुरुवातदेखि नै सरकारले आफ्नो उपस्थिति देखाएको छ तर ति पुग्दो भएनन् । सुरक्षाकर्मीको गोलीले नागरिकको ज्यान गुम्यो, घाइते भए । सुरक्षाकर्मीको तर्फबाट यस्तो क्षति हुनु कुनै पनि हालतमा सामान्य कुरा होइन । यसबारेमा अनुसन्धान सुरू भइसकेको र कानुनबमोजिम कारबाही हुने कुरा म जानकारी गराउँछु । सरकार छ र दोषीमाथि कारबाही हुनेछ भन्ने विश्वास यो सरकारले दिलाउनेछ । सम्पुर्ण घटनाकाबारेमा सरकारले गम्भिर भएर समिक्षा गरेको छ । तपाईहरुले फेरि यस्ता घटना हुन नदिन सरकारले चाल्ने कदमकाबारेमा गम्भिर र जिम्मेवार कदमको महसुस गर्नु हुनेछ ।
मृतकका परिवार, घाइते तथा घाइतेका परिवारहरूलाई न्यायको अनुभूति गराउनका लागि सरकारले आफ्नो पुरा शक्ति लगाएर चाँडो भन्दा चाँडो परिणाम दिनेछ । त्यति बेलासम्मका लागि आफ्नो उत्तेजना, आक्रोश, बदलाको भावनालाई सबैले रोक्नुहोला । हामीलाई धर्मले सिकाउने पनि त्यहि हो ।
मान्छेको सबै भन्दा पहिलो धर्म मान्छे जोगाउनु हो । र सरकारको सबैभन्दा पहिलो धर्म आफ्ना नागरिकलाई सुरक्षित बनाएर कसुरदारलाई कारबाही गर्दै पिडितलाई न्याय र क्षतिपूर्ति दिलाउने हो । सरकारले यो सबै काम यथासक्य चाँडो गर्नेछ ।
फेरि पनि आग्रह गर्छु, मनमा छन् भने पनि तुष, रिस, डर, आक्रोशलाई हटाउनु होला । उत्तेजित हुने वा गराउने कुनै पनि काममा सरिक नभइदिनुहोला । सुरक्षित र संयमीत भएर बसौँ । एकअर्कालाई प्रेम र सम्मान गरौँ । सामाजिक सदभाव कायम राखौँ ।
