सुनसरी । सुनसरीको देवानगञ्ज बजार मंगलबार राति फेरि तनावग्रस्त बनेको छ। दुई समुदायबीच भएको भीषण दोहोरो झडपका कारण बजार क्षेत्र युद्धस्थलजस्तै बनेको छ। साँझ करिब ७ बजेदेखि सुरु भएको झडप डेढ घण्टाभन्दा बढी समयसम्म जारी रहँदा पनि सुरक्षा निकायले अवस्था पूर्ण रूपमा नियन्त्रणमा लिन सकेको छैन।
प्रहरीका अनुसार दुवै पक्षका व्यक्तिहरू रड, भाला, खुँडा, तरबार लगायतका घरेलु हतियार बोकेर बजार क्षेत्रमा उत्रिएपछि एकाएक झडप चर्किएको हो। दुवै पक्षबाट आक्रमण र प्रत्याक्रमण भइरहेका कारण बजार क्षेत्र अत्यन्त तनावपूर्ण बनेको छ। स्थानीयवासी त्रसित बनेका छन् भने अधिकांश पसल बन्द भएका छन्।
घटनास्थलमा नेपाल प्रहरी, सशस्त्र प्रहरी बल तथा अन्य सुरक्षा निकायको ठूलो संख्यामा टोली परिचालन गरिएको छ। सुरक्षाकर्मीहरूले भीड नियन्त्रण गर्न र थप हिंसा फैलिन नदिन प्रयास गरिरहेका छन्। यद्यपि झडप भइरहेका विभिन्न स्थानमा दुवै पक्ष आक्रामक बनेका कारण अवस्था नियन्त्रणमा चुनौतीपूर्ण रहेको सुरक्षा स्रोतले जनाएको छ।
सुनसरी प्रहरीका सूचना अधिकारी डीएसपी चन्द्रबहादुर खड्काले झडप नियन्त्रणका लागि सुरक्षा बल परिचालन गरिएको र स्थिति सामान्य बनाउने प्रयास जारी रहेको जानकारी दिए। घटनामा घाइते तथा क्षतिको विवरण भने तत्काल प्राप्त हुन सकेको छैन।
यसअघि पनि देवानगञ्ज क्षेत्रमा साम्प्रदायिक तनाव उत्पन्न भई झडप, कर्फ्यु र सुरक्षा बल परिचालनसम्मको अवस्था सिर्जना भएको थियो। पछिल्लो घटनापछि स्थानीय प्रशासनले सुरक्षा व्यवस्था थप कडा बनाएको छ भने अवस्थाको निरन्तर निगरानी भइरहेको प्रहरीले जनाएको छ।
