काठमाडौं । प्रधानमन्त्री तथा मन्त्रिपरिषद्को कार्यालयले सुनसरीको देवानगञ्ज गाउँपालिका–३ कप्तानगञ्जमा साउन १० गते भएको घटनाप्रति गम्भीर ध्यानाकर्षण भएको जनाएको छ। सरकारले घटनामा ज्यान गुमाएका व्यक्तिप्रति भावपूर्ण श्रद्धाञ्जली व्यक्त गर्दै घाइते तथा सुरक्षाकर्मीहरूको शीघ्र स्वास्थ्यलाभको कामना गरेको छ।
सरकारले घटनामा घाइते भएकाहरूको निःशुल्क उपचारको व्यवस्था मिलाइएको जनाएको छ। स्वास्थ्य तथा जनसंख्या मन्त्रालयमार्फत उपचारको प्रबन्ध गरिएको उल्लेख गर्दै घटनाको सत्यतथ्य छानबिन गर्न गृह मन्त्रालयले समिति गठन गरेको र उक्त समितिलाई सात दिनभित्र प्रतिवेदन पेश गर्न निर्देशन दिइएको जानकारी गराएको छ। भविष्यमा यस्ता घटना दोहोरिन नदिन आवश्यक सुझावसमेत प्रतिवेदनमा समावेश गरिने जनाइएको छ।
प्रेस विज्ञप्तिमा घटनाबाट प्रभावित तथा पीडित पक्षलाई उचित क्षतिपूर्ति उपलब्ध गराइने र घटनामा संलग्न दोषीमाथि कानुनबमोजिम कडा कारबाही गरिने सरकारको प्रतिबद्धता दोहोर्याइएको छ। साथै कुनै पनि समस्या, असन्तुष्टि वा विवादको समाधान हिंसा वा झडपबाट नभई संवाद र कानुनी प्रक्रियामार्फत हुनुपर्नेमा सरकारले जोड दिएको छ।
सरकारले नेपाली समाजमा कायम रहेको धार्मिक सहिष्णुता, सामाजिक सद्भाव र आपसी एकतालाई खलबल्याउने कुनै पनि गतिविधिमा संलग्न नहुन तथा अफवाह वा भ्रामक सूचनाको पछि नलाग्न सबैमा आग्रह गरेको छ। राजनीतिक दल, नागरिक समाज, धार्मिक संघ–संस्था, सञ्चारमाध्यम र सम्पूर्ण नागरिकलाई शान्ति, सुरक्षा तथा धार्मिक सद्भाव कायम राख्न सहयोग गर्न सरकारको हार्दिक आह्वान रहेको विज्ञप्तिमा उल्लेख छ।
