सुनसरी । हिन्दु र मुस्लिम समुदायबीच गएराति भएको झडपपछि जिल्ला प्रशासन कार्यालय सुनसरीले जिल्लाका पाँच संवेदनशील क्षेत्रमा निषेधाज्ञा जारी गरेको छ। प्रमुख जिल्ला अधिकारीको आदेशअनुसार आइतबार बिहान ७:०० बजेदेखि अर्को सूचना जारी नभएसम्म स्थानीय प्रशासन ऐन, २०२८ को दफा ६(३क) बमोजिम निषेधाज्ञा लागू गरिएको हो।
प्रशासनले हरिनगर गाउँपालिका र देवानगञ्ज गाउँपालिकाका विभिन्न बजार तथा आसपासका क्षेत्रलाई निषेधित क्षेत्र घोषणा गर्दै ती स्थानमा चार जनाभन्दा बढी व्यक्तिको जमघट, भेला, जुलुस, प्रदर्शन, सभा, बैठक तथा कुनै पनि प्रकारका विरोधात्मक गतिविधि गर्न रोक लगाएको जनाएको छ।
जारी आदेशअनुसार घुस्की बजार क्षेत्र, भुटाहा बजार क्षेत्र, कप्तानगञ्ज बजार क्षेत्र, घुस्की बजार क्षेत्र र देवानगञ्ज बजार क्षेत्र मा निषेधाज्ञा लागू गरिएको छ। प्रशासनले शान्ति–सुरक्षा कायम राख्न र सम्भावित अप्रिय घटना रोक्न यस्तो निर्णय गरिएको स्पष्ट पारेको छ।
प्रशासनले निषेधाज्ञा उल्लंघन गर्ने व्यक्तिलाई स्थानीय प्रशासन ऐनअनुसार एक हजार रुपैयाँसम्म जरिवाना वा एक महिनासम्म कैद, वा दुवै सजाय हुन सक्ने चेतावनी दिएको छ। जिल्लावासीलाई संयम अपनाउन, अफवाहमा विश्वास नगर्न तथा शान्ति कायम राख्न प्रशासनले सबै पक्षसँग आग्रह गरेको छ।
