काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुन अवधिभर बाढी, पहिरो, डुबान, कटान, चट्याङ तथा सर्पदंशजस्ता विपद्को जोखिम उच्च रहेकाले सर्वसाधारणलाई विशेष सावधानी अपनाउन आग्रह गरेको छ। प्राधिकरणले जनधनको क्षति न्यूनीकरणका लागि यात्रा गर्नुअघि मौसम र सडकको अवस्थाबारे जानकारी लिन तथा वर्षायाममा अनावश्यक जोखिमपूर्ण यात्रा नगर्न अनुरोध गरेको छ। विशेषगरी ठूलो वर्षा भएका बेला रातिको यात्रा नगर्न, बाढी आएका खोला, खोल्सा वा नदी तर्ने प्रयास नगर्न र पहिरोको जोखिम भएका क्षेत्रमा अनावश्यक आवतजावत नगर्न सचेत गराइएको छ।
प्राधिकरणले वर्षाको समयमा काठदाउरा संकलन, माछा मार्ने वा पौडी खेल्ने उद्देश्यले खोला तथा नदीमा नजान, जोखिमयुक्त पुल वा नदी किनारमा उभिएर फोटो तथा भिडियो नखिच्न र पैदलयात्रा तथा हाइकिङमा सकेसम्म एक्लै नजान आग्रह गरेको छ। विपद्को सङ्केत देखिएमा तत्काल सुरक्षित स्थानमा सर्नुका साथै स्थानीय प्रशासन तथा सुरक्षाकर्मीलाई जानकारी गराउन पनि अनुरोध गरिएको छ।
सूचनामा घर वरपरका ढल तथा नाली सफा राख्न, बर्खायाममा सर्पदंशको जोखिम बढ्ने भएकाले वरपरको वातावरण सफा राख्न तथा राति बाहिर निस्कँदा टर्चलाइट प्रयोग गर्न सुझाव दिइएको छ। चट्याङको सम्भावना देखिएमा सुरक्षित स्थानमा जान, महत्वपूर्ण कागजात, अत्यावश्यक औषधि र नबिग्रने खाद्य सामग्री सुरक्षित झोलामा तयारी अवस्थामा राख्न तथा मोबाइलमा पर्याप्त ब्याट्री र ब्यालेन्स सुनिश्चित गर्न पनि प्राधिकरणले आग्रह गरेको छ।
प्राधिकरणले अफवाहमा विश्वास नगरी आधिकारिक स्रोतबाट प्राप्त सूचना मात्र अनुसरण गर्न, मौसम तथा विपद्सम्बन्धी सूचना नियमित रूपमा सुन्न र हेर्न आग्रह गरेको छ। विपद्सम्बन्धी सूचना तथा उद्धारका लागि १२३४, नेपाल प्रहरीको १००, सशस्त्र प्रहरीको १११४ तथा मौसमसम्बन्धी जानकारीका लागि ११५५ नम्बरमा सम्पर्क गर्न सकिने जनाएको छ। यस वर्षको मनसुन असार ५ गतेदेखि सुरु भएको र त्यसयता निरन्तर सतर्कता अपनाउन आग्रह गर्दै आएको प्राधिकरणले जनाएको छ।
यसैबीच, प्राधिकरणका अनुसार पछिल्लो २४ घण्टामा देशभर ४७ वटा विपद्का घटना भएका छन्। ती घटनामा परी तीन जनाको मृत्यु, आठ जना घाइते तथा करिब १३ लाख १० हजार रुपैयाँ बराबरको अनुमानित क्षति भएको छ। सो अवधिमा सर्पदंश र आगलागीका आठ–आठ, पहिरोका १४, अविरल वर्षाका आठ, बाढीका दुई, जनावर आक्रमणका तीन तथा हावाहुरीको एक घटना दर्ता भएको प्राधिकरणले जनाएको छ।
