काठमाडौं । अविरल वर्षा, बाढी र पहिरोका कारण देशका विभिन्न जिल्लाका प्रमुख राजमार्गहरू प्रभावित भएका छन्। नेपाल प्रहरीले आज बिहान ६:०० बजेसम्मको अद्यावधिक विवरण सार्वजनिक गर्दै कतिपय सडक पूर्ण रूपमा बन्द र केही सडक एकतर्फी सञ्चालनमा रहेको जनाएको छ।
प्रहरीका अनुसार इलाम, पाँचथर, सिन्धुपाल्चोक, बागलुङ, गोरखा र जाजरकोटका विभिन्न सडकखण्ड पूर्ण रूपमा अवरुद्ध छन् भने भोजपुर, खोटाङ र रसुवाका सडकमा एकतर्फी रूपमा सवारी सञ्चालन भइरहेको छ। काभ्रेको बी.पी. राजमार्ग र मकवानपुरको कान्तिलोकपथमा पनि निश्चित समयका लागि सवारी आवागमनमा रोक लगाइएको छ।
प्रहरीले अत्यावश्यकबाहेक जोखिमपूर्ण यात्रा नगर्न, यात्रा गर्नै परे सम्बन्धित जिल्ला प्रहरी कार्यालय वा ट्राफिक प्रहरीसँग सडकको पछिल्लो अवस्था बुझेर मात्र यात्रा गर्न सबै यात्रु तथा सवारी चालकलाई आग्रह गरेको छ।
