काठमाडौं । पछिल्लो समय आफ्नै शरीरमा आगो लगाएर आत्मदाहको प्रयास गर्ने घटनाहरू बढ्दै गएका छन्। यही क्रममा सोमबार काठमाडौंको बौद्ध गेटअगाडि एक २७ वर्षीया महिलाले आफ्नै शरीरमा आगो लगाएर आत्मदाहको प्रयास गर्दा उनी गम्भीर घाइते भएकी छन्।
जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार काभ्रेको तिमाल स्थायी घर भई हाल बौद्ध बस्दै आएकी सालु गुरुङले बेलुकी करिब पौने ४ बजे आत्मदाहको प्रयास गरेकी हुन्। उनको शरीरको करिब ५० प्रतिशत भाग जलेको छ। घटनापछि उनलाई गोकर्णेश्वर–६ स्थित सुष्मा कोइराला मेमोरियल अस्पताल पुर्याइएको थियो।
अवस्था गम्भीर देखिएपछि थप उपचारका लागि कीर्तिपुरस्थित बर्न अस्पतालमा रिफर गरिएको प्रहरीले जनाएको छ।
प्रहरीका अनुसार गुरुङ विवाहित हुन् र बौद्ध क्षेत्रमा खाजाघर सञ्चालन गर्दै आएकी छन्। उनले आत्मदाहको प्रयास किन गरिन् भन्ने विषय खुल्न सकेको छैन। घटनाबारे प्रहरीले आवश्यक अनुसन्धान अघि बढाएको जनाएको छ।
यसअघि केही दिनअघि त्रिपुरेश्वरमा गणेश नेपालीले आफ्नै शरीरमा आगो लगाएर आत्मदाहको प्रयास गरेका थिए। उनको उपचारका क्रममा मृत्यु भएको थियो। त्यस्तै, बुद्धनगरका राउतले पनि आफ्नै शरीरमा आगो लगाएर आत्मदाहको प्रयास गरेको घटना सार्वजनिक भएको थियो। पछिल्ला केही समययता यस्ता घटनाहरू एकपछि अर्को सार्वजनिक हुन थालेका छन्।
मानसिक तनाव, पारिवारिक विवाद, आर्थिक समस्या वा अन्य व्यक्तिगत कारण यस्ता घटनाका सम्भावित कारण हुन सक्ने भए पनि प्रत्येक घटनाको वास्तविक कारण अनुसन्धानबाट मात्र पुष्टि हुने प्रहरीको भनाइ छ।
लगातार आत्मदाह प्रयासका घटना दोहोरिन थालेपछि मानसिक स्वास्थ्य, समयमै परामर्श सेवा र संकटमा परेका व्यक्तिको पहिचान तथा सहयोगका विषयमा गम्भीर बहस आवश्यक देखिएको छ।
