रौतहट । जिल्ला प्रहरी कार्यालय रौतहटले आर्थिक वर्ष २०८२/८३ मा अपराध नियन्त्रण, अनुसन्धान तथा कानुन कार्यान्वयनका क्षेत्रमा उल्लेखनीय उपलब्धि हासिल गरेको जनाएको छ। आइतबार गौरमा आयोजित पत्रकार सम्मेलनमा एसपी सीताराम रिजालले वार्षिक प्रगति प्रतिवेदन सार्वजनिक गर्दै झण्डै ६ करोड रुपैयाँ बराबरका भन्सार छलीका सामान बरामद गरिएको, ४४८ फरार प्रतिवादी पक्राउ गरिएको तथा उनीहरूबाट ७६ वर्ष ११ महिना ११ दिन कैद सजाय कार्यान्वयन गरिनुका साथै ६९ लाख ७१ हजार ८७४ रुपैयाँ जरिवाना असुल गरिएको जानकारी दिए।
एसपी रिजालका अनुसार एक वर्षमा एक हजार १५२ वटा मुद्दा दर्ता भएकामध्ये ६८० वटा फर्छ्योट भएका छन् भने ४७२ वटा अनुसन्धानकै क्रममा छन्। यस अवधिमा चार हजार ८५० ठाडो उजुरी परेकामध्ये चार हजार ३८० फर्छ्योट भएका छन्। विभिन्न प्रकृतिका मुद्दामा ६९४ जना पक्राउ परेका छन् भने लागुऔषध नियन्त्रण अभियानअन्तर्गत ३९ वटा मुद्दा दर्ता गरी ५१ जनालाई पक्राउ गरिएको छ। अभियानका क्रममा ८४७ किलो ७२० ग्राम गाँजा, २५ ग्राम ५१० मिलिग्राम ब्राउन सुगर, चार हजार २६५ नशालु एम्पुल र १३ हजार ९१६ वटा लागुऔषधजन्य ट्याब्लेट बरामद गरिएको प्रहरीले जनाएको छ।
प्रहरीले अवैध हातहतियार नियन्त्रण अभियानमा छ थान हतियार, १९ राउन्ड गोली बरामद गरी तीन जनालाई पक्राउ गरेको छ। खोटा मुद्रासम्बन्धी तीन वटा मुद्दामा सात जनाविरुद्ध कारबाही अघि बढाइएको छ भने एक लाख ३६ हजार रुपैयाँ बराबरका नक्कली नोट बरामद गरिएको छ। यस्तै स्रोत नखुलेको १३ लाख ६२ हजार २०० रुपैयाँसहित चार जना पक्राउ परेका छन्। ट्राफिक व्यवस्थापनतर्फ एक वर्षमा एक हजार ८८ वटा सवारी दुर्घटनामा ५३ जनाको मृत्यु तथा एक हजार ६९६ जना घाइते भएका छन् भने ट्राफिक नियम उल्लङ्घन गर्ने १० हजार २५५ सवारी साधनमाथि कारबाही गरी एक करोड एक लाख ३७ हजार रुपैयाँ राजस्व सङ्कलन गरिएको छ।
भन्सार छली नियन्त्रण अभियानअन्तर्गत १८ जनालाई पक्राउ गरी १५५ वटा सवारी साधन नियन्त्रणमा लिइएको छ। यस क्रममा पाँच करोड ९२ लाख ५५ हजार ७२१ रुपैयाँ बराबरका राजस्व छलीका सामान भन्सार कार्यालयमा दाखिला गरिएको छ, जुन अघिल्लो आर्थिक वर्षको तुलनामा ५.२४ प्रतिशतले बढी रहेको एसपी रिजालले बताए। साथै अवैध काठ नियन्त्रण अभियानमा २२२ क्युबिक फिट सालको काठ बरामद गरी दुई जनालाई पक्राउ गरिएको तथा नदीजन्य पदार्थको अवैध उत्खनन नियन्त्रणबाट दुई लाख ५७ हजार ३०० रुपैयाँ राजस्व सङ्कलन भएको प्रहरीले जनाएको छ। घरेलु मदिरा नियन्त्रण अभियानमा पाँच अवैध भट्टी, एक हजार ५४५ लिटर तयारी मदिरा र दुई हजार लिटर कच्चा पदार्थ नष्ट गरिएको छ।
सामुदायिक प्रहरी साझेदारी कार्यक्रमअन्तर्गत वर्षभरि एक हजार ५४ वटा कार्यक्रम सञ्चालन गरिएको तथा एक लाख ३३ हजार ७६४ सेवाग्राहीले विभिन्न प्रहरी सेवा प्राप्त गरेको कार्यालयले जनाएको छ। पत्रकार सम्मेलनमा एसपी रिजालले सीमित जनशक्तिका बाबजुद अपराध नियन्त्रण, फरार प्रतिवादी पक्राउ, राजस्व छली नियन्त्रण र प्रभावकारी सेवा प्रवाहमा उल्लेखनीय सफलता हासिल भएको उल्लेख गर्दै स्थानीयवासी, सञ्चारकर्मी र सरोकारवाला निकायको सहयोगका कारण यी उपलब्धि सम्भव भएको बताए।
