खोटाङ । गत असार २५ गते खोटाङको दिप्रुङ चुइचुम्मा गाउँपालिका–१ याम्खा मोहोरियामा खुकुरी प्रहारबाट हत्या गरिएका धुर्ब अधिकारीको परिवारलाई ५९ हजार ८१ रुपैयाँ आर्थिक सहयोग प्रदान गरिएको छ। आर्थिक अवस्था कमजोर भएका कारण मृतकको परिवारलाई काजकिरिया सञ्चालन गर्न समेत कठिनाइ भएको जानकारीपछि विभिन्न क्षेत्रबाट सहयोग संकलन गरी राहतस्वरूप उक्त रकम हस्तान्तरण गरिएको हो।
राहत संकलन अभियानका संयोजक राजकुमार कार्कीका अनुसार खोटाङबाट काठमाडौं तथा देशका विभिन्न स्थानमा बसोबास गर्दै आएका ३३ जना सहयोगीबाट संकलित रकम शनिबार मृतकका दाजु राजन अधिकारीलाई हस्तान्तरण गरिएको हो। सहयोग हस्तान्तरण कार्यक्रममा पूर्व संविधानसभा सदस्य विशाल भट्टराईसहित विभिन्न सहयोगदाता तथा स्थानीय व्यक्तित्वहरूको उपस्थिति रहेको थियो।
अभियानमा सक्रिय भवानीशंकर लुइटेलका अनुसार मृतक अधिकारीको परिवारको दयनीय आर्थिक अवस्थालाई ध्यानमा राख्दै मानवीय संवेदनाका आधारमा सहयोग अभियान सञ्चालन गरिएको हो। संकलित रकमले तत्कालका लागि परिवारलाई केही राहत पुग्ने विश्वास व्यक्त गरिएको छ।
गत असार २५ गते छिमेकी तिलक सार्कीको घरमा ट्याक्टर जोतेर काम गरेको पारिश्रमिक माग्न जाँदा धारिलो खुकुरी प्रहारबाट करिब ३६ वर्षीय धुर्ब अधिकारीको घटनास्थलमै मृत्यु भएको थियो। उक्त घटनापछि अपाङ्ग बाबु, श्रीमती र दुई नाबालिका छोरीको पालनपोषण तथा दैनिकीमा गम्भीर समस्या उत्पन्न भएको बताइएको छ।
सहयोग हस्तान्तरण कार्यक्रममा सहभागीहरूले स्वर्गीय धुर्ब अधिकारीप्रति श्रद्धाञ्जली अर्पण गर्दै पीडित परिवारप्रति ऐक्यबद्धता जनाएका थिए। साथै, समाजमा यस्ता दुःखद तथा हिंसात्मक घटना दोहोरिन नदिन सामुदायिक सचेतना, सामाजिक एकता र हिंसा न्यूनीकरणका अभियानलाई प्रभावकारी रूपमा सञ्चालन गर्नुपर्नेमा जोड दिएका थिए।
