काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) ले मनसुनजन्य विपद्को जोखिम बढ्दै गएपछि आवश्यक परे निजी क्षेत्रबाट हेलिकप्टर, ड्रोन र र्याफ्टिङ सेवा परिचालन गर्ने तयारी गरेको छ।
जल तथा मौसम विज्ञान विभागले देशका विभिन्न क्षेत्रमा भारीदेखि अतिभारी वर्षाको पूर्वानुमान गर्दै २१ जिल्लामा बाढी, पहिरो र डुबानको उच्च जोखिम रहेको जनाएको छ। त्यसलाई मध्यनजर गर्दै प्राधिकरणले सुरक्षा निकायसँग समन्वय गरी उद्धार तथा राहतका लागि पूर्वतयारीलाई थप सुदृढ बनाएको हो।
प्राधिकरणका निमित्त कार्यकारी प्रमुख प्रदीपकुमार कोइरालाका अनुसार विपद्को अवस्थामा तत्काल खोज तथा उद्धारका लागि नेपाली सेनाका चारवटा हेलिकप्टर काठमाडौँ, इटहरी, भैरहवा र सुर्खेतमा तयारी अवस्थामा राखिएका छन्। आवश्यकता अनुसार निजी क्षेत्रसँग भएको पूर्वसम्झौताअनुसार हेलिकप्टर, ड्रोन र र्याफ्टिङ सेवा पनि परिचालन गरिने उनले बताए।
गत साता प्राधिकरणले वायुसेवा सञ्चालक सङ्घ, नेपाल, नेपाल ड्रोन सङ्घ तथा नेपाल एसोसिएसन अफ र्याफ्टिङ एजेन्सिज् (नारा)सँग छुट्टाछुट्टै समझदारीपत्रमा हस्ताक्षर गरेको थियो। उक्त समझदारीअनुसार काठमाडौँ उपत्यकाभित्र आवश्यक पर्ने हेलिकप्टर सेवा निःशुल्क उपलब्ध गराइनेछ भने उपत्यकाबाहिर न्यूनतम सञ्चालन खर्चमा सेवा प्रदान गरिने व्यवस्था गरिएको छ।
त्यस्तै, नेपाल ड्रोन सङ्घले विपद्का बेला पाइलटसहित ड्रोन र आवश्यक उपकरण निःशुल्क उपलब्ध गराउने सहमति जनाएको छ। यस्ता टोलीको यात्रा तथा बसोबासको व्यवस्थापन भने प्राधिकरणले गर्नेछ। यस्तै, नारासँग भएको समझदारीअनुसार बाढी, डुबान तथा नदीजन्य विपद्मा खोज तथा उद्धार, राहत सामग्री, औषधि र उद्धार टोलीको ढुवानीका लागि आवश्यक र्याफ्ट र जनशक्ति निःशुल्क उपलब्ध गराइनेछ।
प्राधिकरणका अनुसार यी सबै समझदारी एक वर्षका लागि लागू रहनेछन् र आपसी सहमतिमा आवश्यकता अनुसार नवीकरण गर्न सकिने व्यवस्था गरिएको छ। यस व्यवस्थाले मनसुनजन्य विपद्का बेला उद्धार तथा राहत कार्यलाई थप प्रभावकारी बनाउन सहयोग पुग्ने विश्वास प्राधिकरणले लिएको छ।
