काठमाडौं । सम्माननीय सभामुख डोलप्रसाद (डीपी) अर्याल २१३औँ भानु जयन्तीको अवसरमा भानु प्रतिष्ठानद्वारा आयोजित श्रद्धाञ्जली सभामा सहभागी हुनुभएको छ।
नेपाली भाषा तथा साहित्यका आदिकवि भानुभक्त आचार्यप्रति श्रद्धाञ्जली अर्पण गर्न आयोजित कार्यक्रममा सभामुख अर्यालले भानुभक्तको योगदान नेपाली भाषा, साहित्य तथा राष्ट्रिय एकताको सुदृढीकरणका लागि ऐतिहासिक रहेको बताउनुभयो।
सभामुख अर्यालले संस्कृत भाषामा सीमित रहेको रामायणलाई नेपाली भाषामा अनुवाद गरेर भानुभक्त आचार्यले नेपाली भाषालाई जनजनसम्म पुर्याउने ऐतिहासिक कार्य गरेको उल्लेख गर्नुभयो। उहाँका अनुसार भानुभक्तको साहित्यिक योगदानले नेपाली भाषालाई साझा पहिचानका रूपमा स्थापित गर्दै विभिन्न जाति, भाषा र समुदायबीच एकताको भावना विकास गर्न महत्वपूर्ण भूमिका खेलेको छ।
वि.सं. १८७१ असार २९ गते तनहुँको चुँदीराम्घामा जन्मिएका आदिकवि भानुभक्त आचार्यलाई नेपाली साहित्यको पहिलो महाकवि मानिन्छ। उहाँले नेपाली भाषामा रामायणको सरल र सहज अनुवाद गरी आम नागरिकलाई धार्मिक तथा नैतिक ज्ञान सहज रूपमा उपलब्ध गराउनुभएको थियो। घाँसीबाट प्रेरित भई समाजका लागि केही योगदान गर्नुपर्छ भन्ने भावनासहित उहाँले सिर्जना गरेका कृतिहरू आज पनि उत्तिकै सान्दर्भिक मानिन्छन्।
भानुभक्तको साहित्यले नेपाली समाजमा भाषा, संस्कृति, नैतिकता र सामाजिक चेतनाको विकासमा गहिरो प्रभाव पारेको छ। उहाँका रचनाले नेपाली भाषाको विकाससँगै राष्ट्रिय पहिचान निर्माणमा महत्वपूर्ण योगदान पुर्याएको साहित्यकारहरूको भनाइ छ। प्रत्येक वर्ष असार २९ गते नेपाल तथा विदेशमा रहेका नेपाली समुदायले भानु जयन्ती मनाउँदै उहाँको योगदानको स्मरण गर्ने परम्परा रहेको छ।
भानु प्रतिष्ठानद्वारा आयोजित श्रद्धाञ्जली सभामा विभिन्न क्षेत्रका साहित्यकार, बुद्धिजीवी, जनप्रतिनिधि तथा सर्वसाधारणको सहभागिता रहेको थियो। कार्यक्रममा सहभागीहरूले आदिकवि भानुभक्त आचार्यप्रति श्रद्धासुमन अर्पण गर्दै उहाँका आदर्श, साहित्यिक योगदान र नेपाली समाजलाई एकताबद्ध बनाउन खेलेको भूमिकाको स्मरण गरेका थिए।
