काठमाडौं । समस्याग्रस्त सहकारी व्यवस्थापन समितिले शिव शिखर बहुउद्देश्यीय सहकारी संस्थाका थप ९६ जना पीडित बचतकर्तालाई बचत रकम फिर्ता गरेको छ। समितिले सहकारीबाट पीडित बनेका बचतकर्तालाई क्रमिक रूपमा रकम फिर्ता गर्ने कार्यलाई निरन्तरता दिँदै पछिल्लो चरणमा ९६ जनालाई भुक्तानी गरेको जनाएको छ।
समितिका अनुसार हालसम्म शिव शिखर सहकारीका कुल १ हजार २ सय १३ जना बचतकर्ताले आफ्नो बचत रकम फिर्ता प्राप्त गरिसकेका छन्। रकम फिर्ता प्रक्रियालाई उपलब्ध स्रोत र प्राथमिकताका आधारमा अघि बढाइएको बताइएको छ।
पीडित बचतकर्तालाई वितरण गरिएको रकम समस्याग्रस्त सहकारीको ऋण असुलीबाट प्राप्त रकमबाट व्यवस्थापन गरिएको समितिले जनाएको छ। सहकारीसँग बाँकी रहेको ऋण असुली हुँदै जाँदा प्राप्त रकमलाई बचतकर्ताको हितमा प्रयोग गर्ने नीति अनुसार भुक्तानी भइरहेको समितिको भनाइ छ।
समितिले ऋण असुलीको कार्यलाई थप प्रभावकारी बनाउँदै बाँकी बचतकर्तालाई पनि चरणबद्ध रूपमा रकम फिर्ता गर्ने प्रक्रिया जारी रहने जनाएको छ। साथै, बचतकर्तालाई धैर्य गर्न आग्रह गर्दै उपलब्ध स्रोतअनुसार पारदर्शी र व्यवस्थित ढंगले भुक्तानी गरिने प्रतिबद्धता पनि व्यक्त गरेको छ।
