काठमाडौं । सरकारले मुगुको सोरु गाउँपालिका–१ का २५ वर्षीय जलनका बिरामी गणेश नेपालीलाई उपचारका लागि तत्काल भारत नलैजाने निर्णय गरेको छ। चिकित्सकहरूको सुझावका आधारमा वीर अस्पतालको बर्न आईसीयूमा भेन्टिलेटरमा उपचाररत नेपालीको स्वास्थ्य अवस्था अस्थिर रहेकाले अहिले स्थानान्तरण गर्दा ज्यानमा थप जोखिम हुन सक्ने निष्कर्ष निकालिएको हो। स्वास्थ्य अवस्था स्थिर भएपछि मात्र भारतको नयाँ दिल्लीस्थित एम्स अस्पताल लैजान चिकित्सकहरूले सुझाव दिएका छन्।
यसअघि सरकारले चिकित्सकहरूको प्रारम्भिक सिफारिस अनुसार गणेश नेपालीलाई भारत लैजान सम्पूर्ण तयारी पूरा गरेको थियो। गृहमन्त्री सुदन गुरुङ आफैँको सक्रियतामा विमानस्थलसम्म सुरक्षित ढुवानीका लागि नेपाल प्रहरी र ट्राफिक प्रहरी रातभर परिचालन गरिएको थियो भने एयर एम्बुलेन्सको व्यवस्था समेत मिलाइएको थियो। साथै, सरकारले उपचारको सम्पूर्ण खर्च सरकारी कोषबाट व्यहोर्ने र भारतको विमानस्थलदेखि एम्स अस्पतालसम्मको सबै व्यवस्थापन पनि सुनिश्चित गरेको थियो।
तर उपचारका क्रममा स्वास्थ्य अवस्था थप जटिल बनेपछि स्थानान्तरणको योजना तत्कालका लागि स्थगित गरिएको हो। गृहमन्त्री गुरुङ तथा प्रधानमन्त्री वालेन्द्र शाहको सचिवालयका सदस्यहरू चिकित्सकहरूसँग निरन्तर समन्वय गर्दै वीर अस्पतालमै तयारी अवस्थामा रहेका छन्।
बिहीबार दिउँसो ३ बजे वीर अस्पतालको आकस्मिक कक्षमा भर्ना गरिएका गणेश नेपालीको शरीरको करिब ५५ प्रतिशत भाग जलेको छ। हाल प्लास्टिक सर्जरी विभागका संयोजक डा. पियुष दाहालको नेतृत्वमा २१ सदस्यीय विशेषज्ञ टोली उपचारमा खटिएको छ। टोलीले रक्तचाप नियन्त्रणमा राख्ने तथा स्वास्थ्य अवस्था स्थिर बनाउने उद्देश्यले निरन्तर सघन उपचार र आवश्यक औषधि दिइरहेको अस्पतालले जनाएको छ।
