काठमाडौं । प्रतिनिधिसभाका सभामुख डोलप्रसाद (डीपी) अर्यालसँग नेपालका लागि भारतीय राजदूत नवीन श्रीवास्तवले बिहीबार शिष्टाचार भेटवार्ता गर्दै नेपाल–भारत द्विपक्षीय सम्बन्ध, संसदीय कूटनीति तथा आपसी सहकार्यका विविध विषयमा छलफल गरेका छन्। भेटमा सभामुख अर्यालले नेपाली जनताको जनादेशबाट बनेको सरकारले पहिलो १०० दिन पूरा गरेको उल्लेख गर्दै हालै सम्पन्न निर्वाचनमा भारत सरकारले उपलब्ध गराएको लजिस्टिक सहयोगप्रति आभार व्यक्त गरेका थिए।
सभामुख अर्यालले नेपाल–भारत सम्बन्ध साझा सभ्यता, भौगोलिक निकटता तथा सांस्कृतिक सम्बन्धमा आधारित रहेको उल्लेख गर्दै व्यापार, सुरक्षा, नागरिक उड्डयन, जलस्रोत र कनेक्टिभिटीजस्ता क्षेत्रमा द्विपक्षीय सहकार्य थप सुदृढ हुँदै गएको बताए। उनले हवाई, रेल र बस सेवाको विस्तारले दुई देशबीचको सम्बन्ध अझ मजबुत हुने विश्वास व्यक्त गर्दै भविष्यमा थप उडान तथा नयाँ रुट विस्तारको अपेक्षा पनि गरे।
भेटका क्रममा सभामुख अर्यालले भारतका लोकसभा सभामुख ओम बिरलालाई नेपाल भ्रमणको निमन्त्रणा दिएको जानकारी दिँदै उपयुक्त समयमा स्वागत गर्न नेपाल तयार रहेको बताए।
उनले भारतको संसदलाई लोकतान्त्रिक मूल्य र मान्यताको संरक्षणमा महत्वपूर्ण संस्था भएको उल्लेख गर्दै डिजिटल संसदीय प्रणाली, कागजरहित कार्यप्रणाली तथा ‘नेसनल ई–विधान एप्लिकेसन’ जस्ता प्रविधिमैत्री अभ्यासबाट नेपालले अनुभव आदान–प्रदान गर्न चाहेको धारणा राखे। साथै, माननीय बिपिन आचार्यको नेतृत्वमा नेपाल–भारत संसदीय मैत्री समूह गठन गरिएको जानकारी दिँदै यसले अन्तर–संसदीय सम्बन्धलाई थप गति दिने विश्वास व्यक्त गरे।
सभामुख अर्यालले संसदीय कूटनीतिले दुवै देशका सांसदबीच अनुभव आदान–प्रदान, आपसी समझदारी तथा साझा प्राथमिकताप्रति सम्मान अभिवृद्धि गर्न महत्वपूर्ण भूमिका खेल्ने बताए। उनले नेपालको विकास प्रयासमा भारतको निरन्तर सहयोग महत्त्वपूर्ण रहेको उल्लेख गर्दै शान्ति, समृद्धि र विकासका लागि दुवै देशले सहकार्यलाई अझ सशक्त बनाउनुपर्ने धारणा व्यक्त गरे।
जवाफमा भारतीय राजदूत श्रीवास्तवले लोकसभा सभामुख ओम बिरला नेपाल भ्रमणका लागि इच्छुक रहेको जानकारी दिँदै नेपाली सभामुख तथा सांसदहरूलाई भारतको संसदीय अभ्यास अध्ययनका लागि भारत भ्रमणको निमन्त्रणा दिए। उनले संसदीय कूटनीति र उच्चस्तरीय राजनीतिक संवादले नेपाल–भारत सम्बन्धलाई नयाँ उचाइमा पुर्याउने विश्वास व्यक्त गर्दै व्यापार, कनेक्टिभिटी, ऊर्जा, शिक्षा तथा जनस्तरको सम्बन्ध विस्तारमा भारत सरकार निरन्तर सहकार्य गर्न प्रतिबद्ध रहेको बताए।
