काठमाडौं। प्रधानमन्त्री वालेन्द्र (बालेन) शाहले निर्माण क्षेत्रमा देखिएका समस्या, निर्माण व्यवसायीले भोगिरहेका व्यवहारिक चुनौती तथा समाधानका उपायबारे आज निर्माण व्यवसायीसँग छलफल गर्दै हुनुहुन्छ। प्रधानमन्त्री तथा मन्त्रिपरिषद्को कार्यालयमा बिहान ११:३० बजे हुने उक्त संवादमा निर्माण क्षेत्रसँग सम्बन्धित नीतिगत सहजीकरणका विषयमा पनि विस्तृत छलफल हुने जनाइएको छ।
छलफलमा नेपाल निर्माण व्यवसायी महासङ्घका अध्यक्ष निकोलश पाण्डेको नेतृत्वमा महासङ्घका पदाधिकारी तथा प्रतिनिधिहरू सहभागी हुनेछन्। बैठकमा वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेशका उपाध्यक्ष बालकृष्ण थापा तथा महासङ्घका पूर्वअध्यक्ष एवं सल्लाहकार जयराम लामिछानेको सहभागिता रहनेछ।
संवादका क्रममा निर्माण व्यवसायीहरूले सार्वजनिक खरिद प्रणाली, भुक्तानीमा हुने ढिलाइ, निर्माण सामग्रीको मूल्यवृद्धि, ठेक्का व्यवस्थापन, कानुनी तथा प्रशासनिक जटिलतालगायत निर्माण क्षेत्रले भोगिरहेका समस्याबारे प्रधानमन्त्रीसमक्ष धारणा राख्ने अपेक्षा गरिएको छ। साथै, निर्माण क्षेत्रलाई थप व्यवस्थित र प्रभावकारी बनाउन आवश्यक नीतिगत सुधारका विषयमा पनि सुझाव प्रस्तुत गरिनेछ।
सरकार र निजी निर्माण क्षेत्रबीच प्रत्यक्ष संवादमार्फत समस्याको पहिचान गर्दै समाधान खोज्ने उद्देश्यले आयोजना गरिएको यस छलफललाई निर्माण क्षेत्रको सुधार र पूर्वाधार विकासलाई गति दिने दिशामा महत्वपूर्ण कदमका रूपमा हेरिएको छ। बैठकबाट निर्माण व्यवसायीका जायज माग सम्बोधन गर्न आवश्यक नीतिगत निर्णय तथा सहजीकरणका उपाय अघि बढ्ने अपेक्षा गरिएको छ।
