काठमाडौँ । काठमाडौँ उपत्यकामा पछिल्लो २४ घण्टामा सवारी नियम उल्लङ्घन गर्ने दुई हजार ६६ जना सवारीचालक ट्राफिक कारबाहीमा परेका छन्। काठमाडौँ उपत्यका ट्राफिक प्रहरी कार्यालयका अनुसार विभिन्न प्रकारका ट्राफिक नियम उल्लङ्घन गर्ने चालकहरूबाट कारबाहीस्वरूप राज्यकोषमा १८ लाख ६० हजार ३० रुपैयाँ राजस्व संकलन भएको छ।
कार्यालयका अनुसार मादकपदार्थ सेवन गरेर सवारी चलाउने ६५ जना, नियमविपरीत ‘राइड सेयरिङ’ गर्ने १२२ जना, ट्राफिक सङ्केत बत्ती उल्लङ्घन गर्ने १२० जना तथा तीव्र गतिमा सवारी चलाउने ११४ जनामाथि कारबाही गरिएको छ। ट्राफिक नियमको पालना गराउन नियमित अनुगमन र चेकजाँचलाई थप प्रभावकारी बनाइएको कार्यालयले जनाएको छ।
त्यसैगरी, लेन अनुशासन उल्लङ्घन गर्ने १४२ जना, निषेधित क्षेत्रमा हर्न बजाउने ७४ जना, सडकपेटीमा सवारी पार्किङ गर्ने १०३ जना तथा एकतर्फी सडकमा सवारी चलाउने ८९ जना पनि कारबाहीमा परेका छन्। यसबाहेक अन्य विभिन्न ट्राफिक नियम उल्लङ्घन गर्ने एक हजार २३७ जना चालकलाई समेत कानुनी दायरामा ल्याइएको छ।
ट्राफिक प्रहरीले सडक सुरक्षालाई प्रभावकारी बनाउन नियम उल्लङ्घन गर्ने चालकमाथि निगरानी र कारबाहीलाई निरन्तरता दिइने जनाएको छ। साथै, सबै सवारीचालकलाई ट्राफिक नियमको पूर्ण पालना गर्दै सुरक्षित र जिम्मेवार ढङ्गले सवारी सञ्चालन गर्न आग्रह गरिएको छ।
