काठमाडौं । संघीय संसद्अन्तर्गत प्रतिनिधिसभाको बैठक आज बिहान ११ बजे बस्ने भएको छ। संसद् सचिवालयका अनुसार बैठकमा सरकारका तर्फबाट विभिन्न महत्त्वपूर्ण प्रतिवेदन तथा विधेयकहरू प्रस्तुत गर्ने कार्यसूची तय गरिएको छ।
बैठकमा प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिलामन्त्री सोबिता गौतमले ‘महान्यायाधिवक्ताको वार्षिक प्रतिवेदन २०८१–२०८२’ प्रतिनिधिसभामा पेस गर्नेछिन्। साथै, ‘अख्तियार दुरुपयोग अनुसन्धान आयोगको ३५औँ वार्षिक प्रतिवेदन २०८१–२०८२’ पनि बैठकमा प्रस्तुत गरिनेछ।
त्यसैगरी, मन्त्री गौतमले ‘राष्ट्रिय सेवा दल विधेयक, २०८३’ प्रतिनिधिसभामा प्रस्तुत गर्ने कार्यसूची रहेको छ। उक्त विधेयकले राष्ट्रिय सेवा दलसँग सम्बन्धित कानुनी व्यवस्थालाई थप व्यवस्थित र समसामयिक बनाउने अपेक्षा गरिएको छ।
आजकै बैठकमा ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ माथि विचार गरियोस् भन्ने प्रस्ताव पनि प्रस्तुत गरिने संसद् सचिवालयले जनाएको छ। सरकारका विभिन्न कानुनी तथा नीतिगत प्रस्तावमाथि छलफल अघि बढ्ने भएकाले आजको प्रतिनिधिसभा बैठकलाई महत्त्वपूर्ण रूपमा हेरिएको छ।
