काठमाडौं। प्रतिनिधि सभाको आजको बैठकमा सांसद डा. गंगा लक्ष्मी अवालले आकस्मिक समय माग गर्दै भक्तपुर नगरपालिका–कमलविनायकस्थित कमलपोखरीमा एक आमा र बालकद्वारा गरिएको आत्महत्या प्रयासको संवेदनशील घटनाबारे सरकारको गम्भीर ध्यानाकर्षण गराउनुभएको छ।
उहाँले घटनाको निष्पक्ष छानबिन गर्दै पीडित परिवारलाई आवश्यक संरक्षण, उपचार तथा सहयोग उपलब्ध गराउन सरकारसँग माग गर्नुभयो। सांसद अवालले उक्त घटना केवल एक परिवारको समस्या नभई समाजमा बढ्दो आर्थिक, सामाजिक तथा मानसिक दबाबको संकेत भएको उल्लेख गर्दै यस्ता घटनाको मूल कारण पहिचान गरी रोकथामका लागि प्रभावकारी कदम चाल्नुपर्ने आवश्यकता औँल्याउनुभयो। उहाँले राज्यले नागरिकको जीवन र सुरक्षाप्रति अझ जिम्मेवार बन्नुपर्ने धारणा व्यक्त गर्नुभयो।
त्यसैगरी, उहाँले जुद्ध वरुण यन्त्र भक्तपुरमा कार्यरत कर्मचारीहरूले लामो समयदेखि भोगिरहेका सेवा–सुविधा, व्यवस्थापन तथा कार्यसम्पादनसँग सम्बन्धित समस्याहरू पनि प्रतिनिधि सभामा उठाउनुभयो। ती समस्याको शीघ्र समाधान गरी कर्मचारीहरूको मनोबल उच्च राख्ने वातावरण बनाउन सरकारसँग आग्रह गर्नुभयो।
सांसद अवालले जनजीवनसँग प्रत्यक्ष सरोकार राख्ने यस्ता संवेदनशील विषयमा सरकार समयमै गम्भीर, जिम्मेवार र सक्रिय हुनुपर्नेमा जोड दिनुभयो। उहाँले नागरिकको जीवन, सुरक्षा र श्रमिकको अधिकारसँग जोडिएका विषयमा ढिलाइ नगरी आवश्यक निर्णय र कार्यान्वयन गर्न सरकारलाई आग्रह गर्नुभएको छ।
