सुनसरी । धरान औद्योगिक क्षेत्रमा लामो समयदेखि निष्क्रिय रहेका उद्योगहरूको लिज सम्झौता रद्द गरी पाँच नयाँ उद्योगलाई स्थान दिइएको छ। यससँगै करिब रु ३५ करोड बराबरको स्वदेशी लगानी भित्रिएको छ भने उद्योगहरू पूर्ण रूपमा सञ्चालनमा आएपछि ३५० जनाले प्रत्यक्ष रोजगारी पाउने अपेक्षा गरिएको छ।
धरान औद्योगिक क्षेत्र कार्यालयका प्रमुख जीवनारायण बञ्जाडेका अनुसार औद्योगिक क्षेत्र व्यवस्थापन लिमिटेडले कानुनी प्रक्रिया पूरा गर्दै लामो समयदेखि उत्पादन नगरी जग्गा ओगटेर बसेका उद्योगहरूको लिज सम्झौता रद्द गरेको हो। त्यसपछि सार्वजनिक प्रस्ताव आह्वान तथा आवश्यक मूल्याङ्कन प्रक्रिया पूरा गरी नयाँ उद्योगहरूसँग लिज सम्झौता गरिएको उनले जानकारी दिए।
धरान औद्योगिक क्षेत्रमा थपिएका नयाँ उद्योगहरूमा प्रीति भल्भ एन्ड फिटिङ इन्डस्ट्रिज, जिडी स्टिल इन्डस्ट्रिज, सिद्धि विनायक घरेलु उद्योग, जेआर भेन्चर्स तथा सूर्य डायमन्ड इन्डस्ट्रिज रहेका छन्। यद्यपि सूर्य डायमन्ड इन्डस्ट्रिजको लिज सम्झौता औद्योगिक क्षेत्र व्यवस्थापन लिमिटेडको केन्द्रीय कार्यालयबाट अन्तिम स्वीकृतिको प्रक्रियामा रहेको प्रमुख बञ्जाडेले बताए।
यसअघि नेपाल न्यून नेटवर्क, शुभम् वाटर इन्डस्ट्रिज, जानकी प्रोडक्ट्स, फेमिली युटेन्सिल इन्डस्ट्रिज र कामना मल्टिफोर्ड इन्डस्ट्रिज लामो समयदेखि निष्क्रिय रहेकाले तिनको लिज सम्झौता रद्द गरिएको हो।
नयाँ उद्योगहरू सञ्चालनमा आएपछि प्रीति भल्भ एन्ड फिटिङ इन्डस्ट्रिजले पानीका मिटर तथा फिटिङ सामग्री उत्पादन गर्नेछ भने जिडी स्टिल इन्डस्ट्रिज र जेआर भेन्चर्सले निर्माण सामग्री उत्पादन गर्नेछन्। त्यसैगरी सिद्धि विनायक घरेलु उद्योगले खाद्यान्न तथा पशु आहार उत्पादन गर्नेछ भने सूर्य डायमन्ड इन्डस्ट्रिजले विभिन्न प्रकारका भाँडावर्तन उत्पादन गर्ने तयारी गरेको छ।
प्रमुख बञ्जाडेका अनुसार उत्पादनमुखी उद्योगलाई प्राथमिकता दिँदै आयात प्रतिस्थापन, राजस्व अभिवृद्धि र स्थानीय अर्थतन्त्रलाई चलायमान बनाउने उद्देश्यका साथ नयाँ उद्योगहरूलाई औद्योगिक क्षेत्रमा प्रवेश गराइएको हो। उद्योगहरू पूर्ण रूपमा सञ्चालनमा आएपछि स्वदेशी बजारको माग पूरा गर्नुका साथै केही उत्पादन निर्यात गर्ने सम्भावना समेत रहेको उनले बताए।
हाल धरान औद्योगिक क्षेत्रमा प्लास्टिकजन्य पाइप, खाद्यान्न, धातुजन्य सामग्री, होजियारी तथा डेरीजन्य वस्तु उत्पादन गर्ने उद्योगहरू सञ्चालनमा रहेका छन्।
वि.सं. २०२९ मङ्सिर २६ गते शिलान्यास भई २०३२ पुस १ गतेदेखि सञ्चालनमा आएको धरान औद्योगिक क्षेत्र धरान उपमहानगरपालिका–८, तीनकुनेमा अवस्थित छ। २०२ रोपनी क्षेत्रफलमा फैलिएको यस औद्योगिक क्षेत्रमध्ये १४३ रोपनी १४ आना जग्गा उद्योगलाई भाडामा दिइएको छ भने करिब ५५ रोपनीभन्दा बढी क्षेत्र उपयोगिता (युटिलिटी) सेवाका लागि छुट्याइएको छ।
हाल औद्योगिक क्षेत्रमा ३५ उद्योग रहेका छन्। तीमध्ये ३० उद्योग सञ्चालनमा छन् भने पाँच उद्योग निर्माणको अन्तिम चरणमा रहेका छन्। सञ्चालनमा रहेका उद्योगहरूमा ८०० पुरुष र २०० महिला गरी एक हजार जनाले प्रत्यक्ष रोजगारी पाएका छन्। औद्योगिक क्षेत्रमा निजी क्षेत्रबाट रु दुई अर्बभन्दा बढी तथा सरकारी क्षेत्रबाट रु एक अर्ब ७० करोडभन्दा बढी लगानी रहेको कार्यालयले जनाएको छ।
