काठमाडौँ । नेकपा एमालेले निर्वाचन पराजयको समीक्षा तथा पार्टी पुनर्गठनसम्बन्धी सुझाव संकलन अभियान सम्पन्न गरेको छ। प्रदेश, जनसंगठन, सम्पर्क समन्वय समिति, केन्द्रीय विभाग तथा निकायका नेताबाट सुझाव संकलन गरी त्यसका आधारमा आगामी निर्णय लिने तयारी गरिएको छ। उपाध्यक्षहरू, महासचिवलगायत केन्द्रीय पदाधिकारी विभिन्न प्रदेशमा पुगेर सुझाव संकलनमा सहभागी भएका थिए भने केही कार्यक्रममा अध्यक्ष केपी शर्मा ओली स्वयं उपस्थित भएका थिए।
सुझाव संकलनका क्रममा अध्यक्ष ओलीले आफूले गल्ती नगरेकाले नेतृत्व नछाड्ने स्पष्ट सन्देश दिएका छन्। पुनर्गठनको नाममा सामाजिक सञ्जाल वा अन्य माध्यमबाट पार्टीविरुद्ध गतिविधि गर्नेहरूमाथि कारबाही गरिने चेतावनी दिँदै उनले पार्टी पुनर्गठनबारे आधिकारिक निर्णय नभएको दाबी गरेका छन्। गुटबन्दी नगर्न र पार्टीविरोधी गतिविधिबाट टाढा रहन उनले नेताहरूलाई निर्देशन दिएका थिए।
यद्यपि तल्ला तहका अधिकांश नेताहरूले भने पार्टी पुनर्गठनको आवश्यकता औँल्याएका छन्। जनसंगठन र जिल्ला तहका पदाधिकारीहरूले वर्तमान संकटको समीक्षा गर्दै नेतृत्वसहित समग्र पार्टी संरचनामा सुधार आवश्यक रहेको धारणा राखेका छन्। केही नेताले सामाजिक सञ्जालमा विचार व्यक्त गरेकै आधारमा कारबाही गर्न नमिल्ने भन्दै नेतृत्वकै भूमिकामाथि प्रश्न उठाएका छन्।
सुझाव संकलनबाट प्राप्त धारणा समेटेर महासचिव शंकर पोखरेलले अन्तिम प्रतिवेदन तयार पारिरहेका छन्। उक्त प्रतिवेदनमाथि केन्द्रीय कमिटी बैठकमा छलफल हुने तयारी छ। तर सुझाव संकलन अभियानभर नेतृत्व र पुनर्गठन पक्षधरबीच देखिएको मतभेदका कारण प्रतिवेदन सर्वसम्मत हुने सम्भावना कमजोर रहेको नेताहरूको भनाइ छ।
शनिबार च्यासलमा आयोजित कार्यक्रममा पनि अध्यक्ष ओली र महासचिव पोखरेलका अभिव्यक्तिबाट नेतृत्व र पार्टी सञ्चालनबारे फरक दृष्टिकोण सार्वजनिक भएको छ। ओलीले आफ्नो नेतृत्वको बचाउ गर्दै पुनर्गठन अभियानको औचित्यमाथि प्रश्न उठाए भने महासचिव पोखरेलले कमिटी प्रणाली कमजोर बन्दा पार्टी संकट गहिरिएको बताएका छन्। सुझाव संकलन अभियान सम्पन्न भएसँगै एमालेभित्र नेतृत्व र पुनर्गठनको बहस अझ तीव्र हुने संकेत देखिएको छ।
