काठमाडौं । नेपाल सरकारका पूर्वकर्मचारी भीमप्रसाद उपाध्यायविरुद्ध नेपाल मेडिकल काउन्सिलले नेपाल प्रहरीको साइबर ब्युरोमा उजुरी दर्ता गराएको छ। काउन्सिलका निमित्त रजिष्ट्रार डा. दिपेन्द्र पाण्डेको चरित्रहत्या गरेको तथा सामाजिक सञ्जालमार्फत भ्रामक र निन्दनीय सामग्री प्रसारण गरी संस्थाको प्रतिष्ठामा आँच पुर्याएको आरोप लगाउँदै बुधबार भोटाहिटीस्थित साइबर ब्युरोमा उजुरी दर्ता गरिएको हो।
काउन्सिलले दिएको उजुरीअनुसार उपाध्यायले आफ्नो आधिकारिक फेसबुक प्रोफाइलमार्फत असार १६ गते डा. दिपेन्द्र पाण्डेको तस्बिर अनधिकृत रूपमा प्रयोग गर्दै भ्रामक, अपमानजनक र मानहानि हुने प्रकृतिको सामग्री सार्वजनिक गरेका थिए। उक्त पोस्टमा ‘नक्कली डाक्टर भन्दै आरोप लगाई प्रहरीमा जाहेरी दिने र ७ दिन हिरासतमा राख्ने प्रपञ्च गर्ने…’ लगायतका अभिव्यक्तिमार्फत निमित्त रजिष्ट्रार तथा काउन्सिलका अन्य पदाधिकारीप्रति गालीगलौज र आधारहीन आरोप लगाइएको काउन्सिलको दाबी छ।
मेडिकल काउन्सिलका अनुसार काउन्सिलमा दर्ता नभएका व्यक्तिहरूले एलोप्याथिक औषधि सिफारिस गर्ने तथा रेडियोलोजिस्टले मात्र गर्न मिल्ने एमआरआईजस्ता विशेषज्ञ सेवा सञ्चालन गरेको उजुरी परेपछि कानुनबमोजिम छानबिन गरिएको थियो। छानबिनबाट दोषी देखिएका व्यक्तिविरुद्ध कानुनी प्रक्रिया अघि बढाइएको र सो विषय हाल अदालतमा विचाराधीन रहेको काउन्सिलले जनाएको छ।
काउन्सिलले आफ्नो नियामक तथा कानुनी जिम्मेवारीअन्तर्गत गरिएको कार्यलाई व्यक्तिगत रिसइबीको रूपमा चित्रण गर्दै उपाध्यायले सामाजिक सञ्जालमार्फत साइबर बुलिङ, भ्रम फैलाउने तथा संस्थाप्रति जनविश्वास कमजोर बनाउने प्रयास गरेको उजुरीमा उल्लेख गरेको छ। यसबाट काउन्सिलका पदाधिकारीको पेसागत प्रतिष्ठामा समेत गम्भीर क्षति पुगेको दाबी गरिएको छ।
काउन्सिलले उपाध्यायको गतिविधि विद्युतीय कारोबार ऐन, २०६३ को दफा ४७ विपरीत रहेको जिकिर गर्दै तत्काल पक्राउ गरी आवश्यक कानुनी कारबाही गर्न साइबर ब्युरोसँग माग गरेको छ। उजुरीसँगै उपाध्यायले फेसबुकमा सार्वजनिक गरेका पोस्टका स्क्रिनसट तथा अपमानजनक टिप्पणीहरूको प्रतिलिपिसमेत प्रमाणका रूपमा प्रहरीलाई बुझाइएको काउन्सिलका एक अधिकारीले जानकारी दिएका छन्।
