काठमाडौं । नेपालको ६८औँ संसद दिवस तथा १३७औँ विश्व संसद दिवसको अवसरमा आयोजित विशेष कार्यक्रममा सम्माननीय सभामुख डोलप्रसाद (डीपी) अर्यालले संसद लोकतन्त्रको सर्वोच्च थलो भएकाले यसको गरिमा जोगाउने जिम्मेवारी सबै सांसदको भएको बताएका छन्।
उनले ऐतिहासिक विरासतलाई आत्मसात् गर्दै संसदलाई मर्यादित, प्रभावकारी र जनविश्वासको केन्द्रका रूपमा स्थापित गर्न सांसदहरू संयमित, शिष्ट र जिम्मेवार हुनुपर्नेमा जोड दिए। सभामुख अर्यालले नेपालको संसदीय इतिहास स्मरण गर्दै २०१६ साल असार १६ गते राति ११:४५ बजे बोलाइएको नेपालको पहिलो संसदको पहिलो बैठकलाई लोकतान्त्रिक यात्राको ऐतिहासिक सुरुआतका रूपमा उल्लेख गरे।
उनले त्यतिबेला अधिकांश सांसद साँझको खाना खाएर पैदलै सिंहदरबार पुगेको, कतिपयको खुट्टामा जुत्तासमेत नभएको तथा राति १२ बजे सुरु भएको बैठक राति २ बजे सम्पन्न भएको प्रसंग सुनाउँदै लोकतन्त्रप्रतिको त्याग, समर्पण र प्रतिबद्धता अहिलेका जनप्रतिनिधिका लागि प्रेरणाको स्रोत भएको बताए।
उनले इतिहासमा तत्कालीन दरबारले संसदको आयु छोटो होस् भन्ने दुराशयका साथ ज्योतिषीहरूको परामर्शमा मध्यरातको तथाकथित ‘खराब साइत’ मा पहिलो बैठक बोलाइएको भन्ने चर्चा भए पनि नेपाली जनताको लोकतान्त्रिक आकांक्षालाई कुनै पनि शक्ति रोक्न नसकेको उल्लेख गरे। अनेक उतारचढाव पार गर्दै संसदीय व्यवस्था आजको अवस्थासम्म आइपुगेको भन्दै उनले लोकतान्त्रिक संस्थाहरूलाई थप सुदृढ बनाउनु अहिलेको आवश्यकता भएको धारणा राखे।
सभामुख अर्यालले संसदभित्र हुने बहस, विमर्श र असहमति लोकतन्त्रको स्वाभाविक अभ्यास भए पनि त्यसलाई मर्यादित र सभ्य ढंगले प्रस्तुत गर्नुपर्ने बताए। सांसदहरूको व्यवहार, भाषा र प्रस्तुतिले संसदप्रति नागरिकको धारणा निर्माण गर्ने भएकाले व्यक्तिगत वा दलगत मतभिन्नताभन्दा माथि उठेर राष्ट्रिय हितलाई केन्द्रमा राख्न उनले आग्रह गरे।
उनले संसद जनताको विश्वास र आशाको केन्द्र भएकाले जनप्रतिनिधिहरूले आफ्नो भूमिका थप जिम्मेवारीपूर्वक निर्वाह गर्नुपर्ने उल्लेख गरे। लोकतान्त्रिक मूल्य, विधिको शासन, पारदर्शिता र जवाफदेहितालाई व्यवहारमा उतार्दै संसदलाई जनमुखी र परिणाममुखी बनाउनु आजको प्रमुख दायित्व भएको उनको भनाइ थियो।
६८औँ संसद दिवस तथा १३७औँ विश्व संसद दिवसले नेपालको संसदीय इतिहास, लोकतान्त्रिक संघर्ष र जनप्रतिनिधिहरूको जिम्मेवारीलाई पुनः स्मरण गराएको उल्लेख गर्दै सभामुख अर्यालले इतिहासबाट प्रेरणा लिएर भविष्यप्रति उत्तरदायी बन्न सबै सांसदलाई आह्वान गरे। उनले संयम, शिष्टता, सहिष्णुता र उच्च संसदीय संस्कारमार्फत लोकतन्त्रलाई अझ सुदृढ बनाउन सबै राजनीतिक दल र सांसदहरूले साझा प्रतिबद्धताका साथ अघि बढ्नुपर्नेमा जोड दिए।
