काठमाडौँ । अमेरिकी राष्ट्रपति डोनाल्ड ट्रम्पले इरानसँगको युद्ध अन्त्य भएको दाबी गर्दै दुई देशबीच महत्वपूर्ण समझदारीको अन्तिम चरणमा पुगेको बताएका छन्। तर इरानले भने कुनै अन्तिम सम्झौता नभएको स्पष्ट पारेको छ।
बिहीबार ह्वाइट हाउसको ओभल अफिसमा सञ्चारकर्मीसँग कुरा गर्दै ट्रम्पले इरानले आणविक हतियार नबनाउने प्रतिबद्धता जनाएको र यही अमेरिकाको प्रमुख उद्देश्य रहेको बताए। उनले सम्भावित सम्झौता केही दिनभित्र युरोपमा हस्ताक्षर हुन सक्ने संकेत गर्दै त्यसका लागि उपराष्ट्रपति जेडी भान्स सहभागी हुन सक्ने बताए। ट्रम्पका अनुसार सम्झौता कार्यान्वयनमा आएपछि रणनीतिक जलमार्ग स्ट्रेट अफ हर्मुज पुनः खुला गरिनेछ। उनले सोही दिनका लागि तय गरिएका सैन्य आक्रमणसमेत स्थगित गरिएको जानकारी दिए।
तर इरानले ट्रम्पको दाबीलाई तत्काल स्वीकार गरेको छैन। इरानी विदेश मन्त्रालयका प्रवक्ता इस्माइल बाघेईले हालसम्म कुनै अन्तिम निर्णय नभएको र सम्झौता सम्पन्न भइसकेको भन्ने चर्चा समयअघि गरिएको अड्कलबाजी मात्र भएको बताएका छन्। उनले वार्तामा केही प्रगति भए पनि इरानले आफ्ना ‘रेड लाइन’ सम्बन्धी विषयमा कुनै सम्झौता नगर्ने स्पष्ट पारे।
कतार तथा अन्य मध्यस्थकर्ताको पहलमा वार्ता जारी रहे पनि केही महत्वपूर्ण विषयमा अझै सहमति जुट्न बाँकी रहेको अन्तर्राष्ट्रिय सञ्चारमाध्यमहरूले जनाएका छन्।
यसैबीच, ट्रम्पको घोषणाले इजरायली प्रधानमन्त्री बेन्जामिन नेतन्याहुलाई समेत आश्चर्यमा पारेको बताइएको छ। नेतन्याहुले इरानको आणविक कार्यक्रम नियन्त्रणमा ल्याउने प्रयासको प्रशंसा गरे पनि इजरायल उक्त प्रारम्भिक समझदारीको प्रत्यक्ष पक्ष नरहेको जनाइएको छ।
युद्ध अन्त्यतर्फ कूटनीतिक पहल अघि बढेको संकेतसँगै अन्तर्राष्ट्रिय बजारमा कच्चा तेलको मूल्यमा गिरावट आएको छ भने अमेरिकी शेयर बजारमा सकारात्मक प्रभाव देखिएको छ।
