भक्तपुर । सूर्यविनायक नगर वडा नं. ५ मा आयोजित वडा स्तरीय सार्वजनिक सुनुवाइ कार्यक्रममा स्थानीय बासिन्दाहरूले खानेपानीको समस्या प्रमुख रूपमा उठाएका छन्।
क्रियाशील पत्रकार मञ्च भक्तपुरकाे आयाेजनामा आयाेजित साे कार्यक्रममा विभिन्न टोलहरूमा ढलान तथा पिच सडक निर्माण भए पनि अधिकांश बस्तीमा अझै सहज रूपमा खानेपानी उपलब्ध हुन नसकेको भन्दै सहभागीहरूले गुनासो गरेका थिए। स्थानीयहरूले विकास निर्माणका कामसँगै आधारभूत आवश्यकतामा पनि ध्यान दिनुपर्ने माग गरेका छन्।
सार्वजनिक सुनुवाइमा वडावासीहरूले पछिल्लो समय मोटरसाइकल तथा घरमा चोरीका घटना बढ्दै गएको भन्दै सुरक्षाको विषयमा पनि चिन्ता व्यक्त गरे। विभिन्न स्थानमा सीसी क्यामेरा जडान नभएका कारण चोरीका घटनामा वृद्धि भएको दाबी गर्दै वडाले सार्वजनिक सुरक्षाका लागि आवश्यक व्यवस्था गर्नुपर्ने उनीहरूको माग थियो।
कार्यक्रममा उठेका प्रश्नहरूको जवाफ दिँदै वडा अध्यक्ष राजकुमार जोशीले केन्द्रीय बजेटको सीमितताका कारण सबै योजना कार्यान्वयन गर्न कठिनाइ भएको बताए। उनले खानेपानी व्यवस्थापन तथा सीसी क्यामेरा जडानका लागि प्रदेश सरकारबाट बजेट प्राप्त हुने आशामा रहेको जानकारी दिँदै आवश्यक स्रोत सुनिश्चित भएपछि प्राथमिकताका साथ काम अगाडि बढाइने बताए।
त्यसैगरी, विभिन्न बस्तीका युवाहरूमा लागुऔषध तथा अन्य दुर्व्यसनको समस्या बढ्दै गएको विषय पनि सार्वजनिक सुनुवाइमा उठाइएको थियो। वडावासीहरूले युवालाई दुर्व्यसनबाट जोगाउन सचेतनामूलक कार्यक्रम तथा प्रभावकारी नियन्त्रणका उपायहरू अपनाउन स्थानीय सरकारसँग आग्रह गरेका छन्।
