काठमाडौं । राष्ट्रिय आदिवासी जनजाति महिला महासंघले आदिवासी जनजाति महिलाका हक, अधिकार, पहिचान तथा समान सहभागिताका विषयमा सरकारको ध्यानाकर्षण गराउन बुधबार काठमाडौंको माइतीघर मण्डलामा सांकेतिक धर्ना कार्यक्रम आयोजना गरेको छ।
धर्नामा विभिन्न आदिवासी जनजाति समुदायका महिला, अधिकारकर्मी तथा सरोकारवालाहरूको सहभागिता रहेको थियो। सहभागीहरूले आदिवासी जनजाति महिलाको प्रतिनिधित्व वृद्धि, समान अवसरको सुनिश्चितता, सामाजिक न्याय तथा संवैधानिक अधिकारको प्रभावकारी कार्यान्वयनको माग गरेका थिए।
कार्यक्रमका क्रममा उनीहरूले आफ्नो भाषा, संस्कृति र पहिचानको संरक्षण तथा प्रवर्द्धनका लागि राज्यले विशेष नीति, कार्यक्रम तथा बजेट व्यवस्था गर्नुपर्ने आवश्यकता औँल्याए। साथै, आदिवासी जनजाति महिलामाथि हुने विभेद, हिंसा र सामाजिक बहिष्करण अन्त्यका लागि प्रभावकारी कदम चाल्न सम्बन्धित निकायसँग आग्रह गरेका छन्।
धर्नालाई सम्बोधन गर्दै वक्ताहरूले आदिवासी जनजाति महिलाका मुद्दा कुनै एक समुदायमा सीमित नभई समावेशी लोकतन्त्र, सामाजिक न्याय र दिगो विकाससँग प्रत्यक्ष रूपमा जोडिएको विषय भएको बताए। उनीहरूले राज्यका सबै तह र संरचनामा आदिवासी जनजाति महिलाको अर्थपूर्ण तथा प्रभावकारी सहभागिता सुनिश्चित गर्नुपर्नेमा जोड दिएका थिए।
महासंघका अनुसार कार्यक्रम शान्तिपूर्ण रूपमा सम्पन्न भएको छ। धर्नामार्फत आदिवासी जनजाति महिलाका अधिकार, पहिचान र सहभागिताका सवालमा राज्यको गम्भीर ध्यानाकर्षण गराउने उद्देश्य राखिएको आयोजकले जनाएको छ।
