काठमाडौं । महोत्तरीमा घरमा चोरी गर्न आएका व्यक्तिहरूसँग प्रतिवाद गर्दा एक दम्पती गोली लागेर घाइते भएका छन्। घटना सोनमा गाउँपालिका–३ को खखना दक्षिणबारी टोलमा मंगलबार राति भएको हो।
प्रहरीका अनुसार ५–६ जना अपरिचित व्यक्ति रातिको समयमा घरभित्र प्रवेश गरी चोरी गर्ने प्रयास गरिरहेका बेला घरधनी २७ वर्षीय रामईश्वर यादव र उनकी २२ वर्षीया श्रीमती किरण यादवले प्रतिवाद गरेका थिए। सोही क्रममा चोरी गर्न आएका व्यक्तिहरूले उनीहरूमाथि गोली प्रहार गरेका थिए।
गोली लागेर घाइते भएका दुवै जनालाई तत्काल स्थानीय स्वास्थ्य संस्थामा उपचारका लागि लगिएको थियो। प्रारम्भिक उपचारपछि थप उपचारका लागि उनीहरूलाई जनकपुरस्थित अस्पतालमा रेफर गरिएको प्रहरीले जनाएको छ। हाल दुवैको उपचार भइरहेको छ।
घटनापछि प्रहरी टोलीले घटनास्थलको निरीक्षण गरी एक थान गोलीको खोका बरामद गरेको छ। घटनामा संलग्न व्यक्तिहरू फरार रहेकाले उनीहरूको खोजी तीव्र पारिएको प्रहरीले जनाएको छ।
जिल्ला प्रहरी कार्यालय महोत्तरीका अनुसार घटनाको प्रकृति, प्रयोग भएको हतियार तथा संलग्न व्यक्तिहरूको पहिचानका विषयमा थप अनुसन्धान भइरहेको छ। स्थानीयवासीमा त्रास फैलाएको उक्त घटनाले जिल्लाको सुरक्षा अवस्थाप्रति समेत चासो बढाएको छ।
