काठमाडौँ । सूचना तथा सञ्चार मन्त्री डा. विक्रम तिमिल्सिना र संयुक्त राज्य अमेरिकाको सार्वजनिक कूटनीति तथा जनसम्पर्कसम्बन्धी उपविदेशमन्त्री साराह बी. रोर्जस बीच सोमबार भेटवार्ता भएको छ।
भेटमा नेपाल–अमेरिका सम्बन्ध, सञ्चार तथा सूचना प्रविधि क्षेत्रको सहकार्य र जनस्तरको सम्बन्ध विस्तारका विषयमा छलफल भएको जनाइएको छ।
भेटवार्ताका क्रममा मन्त्री तिमिल्सिनाले नेपालको सञ्चार क्षेत्रको विकास, डिजिटल रूपान्तरण तथा सूचना पहुँच विस्तारका लागि सरकारले अघि बढाइरहेका कार्यक्रमबारे जानकारी गराएका थिए। उनले प्रविधिमैत्री समाज निर्माण तथा सञ्चार पूर्वाधार सुदृढीकरणमा अन्तर्राष्ट्रिय सहकार्यको महत्व रहेको उल्लेख गरेका थिए।
उपविदेशमन्त्री रोर्जसले लोकतान्त्रिक मूल्य, स्वतन्त्र सञ्चार माध्यम तथा जनसम्पर्कका क्षेत्रमा नेपाल र अमेरिकाबीच रहेको सहकार्यलाई अझ सुदृढ बनाउने प्रतिबद्धता व्यक्त गरेकी थिइन्। उनले शिक्षा, सञ्चार, युवा आदानप्रदान तथा डिजिटल साक्षरताका कार्यक्रममार्फत दुई देशबीचको सम्बन्ध थप प्रगाढ बनाउन सकिने धारणा राखिन्।
भेटमा दुवै पक्षले सूचना तथा सञ्चार क्षेत्रको क्षमता अभिवृद्धि, डिजिटल नवप्रवर्तन प्रवर्द्धन तथा जनस्तरमा आपसी समझदारी विस्तार गर्ने विषयमा सहकार्य बढाउने विषयमा समेत विचार आदानप्रदान गरेका थिए। उक्त भेटवार्ता सौहार्दपूर्ण वातावरणमा सम्पन्न भएको मन्त्रालय स्रोतले जनाएको छ।
