गतवर्ष एक लाख १२ हजार अमेरिकी पर्यटकले नेपाल भ्रमण गरेको जानकारी दिँदै रोजर्सले अमेरिकालाई नेपालको दोस्रो ठूलो पर्यटक स्रोत बजारका रूपमा चित्रण गरिन् ।
नेपालमा नवप्रवर्तन, लगानी र आर्थिक वृद्धिको पर्याप्त सम्भावना रहेको उल्लेख गर्दै उनले व्यवसाय र लगानीका लागि वातावरण थप अनुकूल बन्दै गए अमेरिकी कम्पनीहरू नेपालका अझ बलिया साझेदार बन्न सक्ने धारणा राखिन् ।
नेपालको सार्वभौमसत्ता, आर्थिक वृद्धि र साझा समृद्धिलाई प्रवर्द्धन गर्न नेपाल सरकार तथा नेपाली जनतासँगको साझेदारीलाई अझ मजबुत बनाउन अमेरिका प्रतिबद्ध रहेको उनको भनाइ थियो ।
उनले परराष्ट्रमन्त्री शिशिर खनाल र सञ्चार तथा सूचना प्रविधिमन्त्री डा. विक्रम पाण्डेसँग भेटवार्ता गरी आर्थिक सम्बन्ध सुदृढीकरण, व्यापारिक वातावरण सुधार तथा डिजिटल पहुँच विस्तारका विषयमा छलफल गरेको जानकारी दिइन् ।
आइतबार आयोजित ‘एसेन्ट समिट’ मा मुख्य वक्ताका रूपमा सहभागी भएको उल्लेख गर्दै उनले नेपाली तथा अमेरिकी कम्पनी, पर्वतारोही र नवप्रवर्तकहरूबीच हिमालय क्षेत्रमा साहसिक पर्यटन र प्रविधिको भविष्यबारे विचार आदानप्रदान भएको बताइन् ।
