काठमाडौं । आरती न्यौपानेले कम उमेरमै सहसचिव पदमा नियुक्त भएर नयाँ रेकर्ड कायम गर्नुभएको छ। ३१ वर्षको उमेरमै खुला प्रतिस्पर्धाबाट सहसचिव बन्न सफल भएपछि उहाँ अहिले चर्चाको केन्द्रमा रहनुभएको छ। सार्वजनिक प्रशासन जस्तो जिम्मेवार क्षेत्रमा कम उमेरमै यस्तो उपलब्धि हासिल गर्नु उल्लेखनीय मानिएको छ।
यसअघि खुला प्रतिस्पर्धाबाट सबैभन्दा कम उमेरमा सहसचिव बन्ने रेकर्ड प्रदिप परियार का नाममा रहेको थियो। उहाँ ३२ वर्षको उमेरमा सहसचिव बन्न सफल हुनुभएको थियो। आरती न्यौपानेले उक्त रेकर्ड एक वर्षले तोड्दै नयाँ इतिहास कायम गर्नुभएको हो।
प्रशासनिक क्षेत्रका जानकारहरूले आरती न्यौपानेको सफलता मेहनत, निरन्तर अध्ययन र प्रतिस्पर्धात्मक क्षमताको परिणाम भएको बताएका छन्। युवापुस्ताका लागि उहाँको उपलब्धि प्रेरणादायी उदाहरण बनेको प्रतिक्रिया पनि सामाजिक सञ्जालदेखि प्रशासनिक वृत्तसम्म देखिएको छ।
नेपालको निजामती प्रशासनमा युवा पुस्ताको सहभागिता र नेतृत्व क्षमताको उदाहरणका रूपमा आरती न्यौपानेको सफलता हेरिएको छ। कम उमेरमै उच्च जिम्मेवारी सम्हाल्ने अवसर पाएसँगै उहाँले आगामी दिनमा प्रभावकारी कार्यसम्पादन गर्ने अपेक्षा गरिएको छ।
